BAKI, AzerVoice, Nailə Babazadə

İsrail ordusunun hücumları və blokadası altında olan Qəzza zolağında bir uşaq xəstəxanası ilə bir göz xəstəxanasının fəaliyyətini dayandırdığı, bir səhiyyə obyektinin isə dağıldığı bildirilib.

AzerVoice xəbər verir ki, Qəzzadaki Səhiyyə Nazirliyinin verdiyi açıqlamada, İsrail ordusunun xəstəxana və səhiyyə mərkəzlərinə qarşı qanun pozuntularını davam etdirdiyi qeyd olunub.

İsrailin aramsız hücumları nəticəsində Qəzza şəhərində yerləşən Rantisi Uşaq Xəstəxanası ilə Göz Xəstəxanasının fəaliyyətini dayandırdığı, şəhərdə yerləşən Tibbi Yardım Mərkəzinin isə tamamilə dağıldığı bildirilib.

Açıqlamada, İsrail ordusunun daha əvvəl də Rantisi Xəstəxanasını hədəf alaraq ciddi ziyan vurduğu xatırladılıb və Göz Xəstəxanasının Qəzza zolağının şimalında bu sahədə xidmət göstərən yeganə səhiyyə müəssisəsi olduğu vurğulanıb.

Nazirlik əlavə edib ki, "işğalçı İsrail Qəzza zolağında həyata keçirdiyi soyqırımın bir hissəsi olaraq səhiyyə sistemini məqsədli və sistemli şəkildə hədəfə alır."

Qəzzada xəstələrin və yaralıların səhiyyə müəssisələrinə çatması üçün təhlükəsiz yolların mövcud olmadığı, hücumlar səbəbilə Qüds Xəstəxanasına və İordaniya Sahra Xəstəxanasına çatmağın böyük çətinlik yaratdığı qeyd olunub.

Səhiyyə Nazirliyi beynəlxalq ictimaiyyətə müraciət edərək Qəzza zolağındakı səhiyyə obyektlərinin, tibb işçilərinin və xəstələrin mühafizəsinin təmin olunması üçün bir daha çağırış edib.

Xatırladaq ki, İsrail ordusu sentyabrın 17-də Rantisi Uşaq Xəstəxanasının yuxarı mərtəbələrini hədəf almışdı. Bu xəstəxana Qəzzada onkologiya, dializ, tənəffüs və həzm sistemi xəstəlikləri üzrə yeganə ixtisaslaşmış tibb müəssisəsi kimi tanınır.

İsrail ordusu Qəzza zolağının müxtəlif bölgələrini intensiv şəkildə bombalamaqda davam edir. Bu hücumlar nəticəsində Qəzza şəhəri yaşanmaz hala gətirilir və mülki əhali məcburi köçkün vəziyyətinə salınır.

İsrailin 7 oktyabr 2023-cü ildən bu yana Qəzzaya qarşı həyata keçirdiyi hücumlarda ən azı 65 min 344 fələstinli həlak olub, 166 min 795 nəfər isə yaralanıb.