BAKI, AzerVoice, Nailə Babazadə

İsrail ordusunun hava bombardmanlarının ardından 15 sentyabrdan etibarən başlatdığı quru hücumlar Qəzza şəhərində humanitar fəlakəti daha da dərinləşdirib. Sürətlə artan hücumlar səbəbilə fələstinlilər şimal bölgələrdən cənuba doğru kütləvi şəkildə köç etməyə məcbur edilir.

AzerVoice xəbər verir ki, İsrail ordusu, Qəzza şəhərindəki fələstinlilərin yaşadığı məhəllələri, infrastruktur obyektlərini və yardım nöqtələrini hədəf alır. Bombardmanlardan sonra isə quru hücumları ilə bölgədə tam işğal planını həyata keçirməyə çalışır. Rəsmi məlumata görə, Qəzza Zolağının 88 faizi ya tam işğal olunub, ya da "təxliyə əmrləri" altında fələstinlilərə boşaldılması tələb edilib.

Hazırda təxminən 2,3 milyon insan dar bir əraziyə sıxışdırılıb və yaşayış üçün minimum şəraitin belə olmadığı mərkəzi bölgələrə doğru sürülür. Humanitar təşkilatlar bu vəziyyəti ikinci “Nəkbə” – Böyük Fəlakət adlandırır.

İsrailin artan hücumları və yardım girişlərini məhdudlaşdırması səbəbilə fələstinlilər həyatda qalmaq üçün bir daha seçim qarşısındadır: ya bombardman altında qalmaq, ya da naməlum təhlükələrə doğru köç etmək.

Avtomobili olmayan minlərlə fələstinli — aralarında qocalar, uşaqlar, xəstələr və əlillər olmaqla — təxminən 20 kilometrlik yolu piyada qət etməyə çalışır. Uşaqlar əllərində az miqdarda əşya daşıyaraq valideynlərinə kömək edir, bəziləri isə əlil arabasında və ya qoltuq ağacları ilə irəliləyir.

Yerindən edilən fələstinlilər, çadırlıq yerin belə tapılmadığı və infrastrukturu olmayan Qəzzanın mərkəzi hissələrinə sıxışdırılır. Lakin bu bölgələr də təhlükəsiz deyil. İsrail ordusu, son günlərdə Qəzzanın mərkəzində yerləşən ərazilərə də hava zərbələri endirib.

İsrail ordusu son açıqlamasında son bir ayda təxminən 400 min fələstinlinin Qəzza şəhərindən cənuba doğru köç etdiyini bildirib. Lakin yerli mənbələrə görə, şəhərdə hələ də 1 milyona yaxın insan bombardmanlar və aclıq altında yaşam mübarizəsi aparır.

BMT və digər beynəlxalq təşkilatlar bölgədə “təhlükəsiz yerin qalmadığını” bildirərək, mülki əhalinin qorunmasına çağırır.

Qəzza Zolağında yaşananlar artıq sadəcə bir hərbi əməliyyat deyil, kütləvi məcburi köç, humanitar böhran və beynəlxalq hüququn pozulmasıdır. Dünyanın gözü qarşısında yaşanan bu proses, yüz minlərlə insanın taleyini qaranlıqda buraxır.