BAKI, AzerVoice, Nailə Babazadə

İsrail ordusu bu gün səhər saatlarından etibarən Qəzza şəhərinə yönələn quru hücumunu genişləndirərək intensiv hava zərbələri endirib. Hücumlar nəticəsində azı 17 fələstinli, o cümlədən 7 nəfər Qəzza şəhərində həlak olub, onlarla insan yaralanıb.

AzerVoice xəbər verir ki, Fələstin rəsmi agentliyi “Vafa”-nın məlumatına görə, Xən Yunusun Məvasi bölgəsində yerləşən qaçqın çadırına endirilən zərbədə eyni ailədən 3 nəfər həyatını itirib. Mərkəzdə, Nuseyrat düşərgəsində isə bir ailənin evi hədəfə alınaraq ata, hamilə ana və qız övladı öldürülüb. Qəzzanın cənubunda Tel əl-Həva məhəlləsində yerləşən yaşayış mənzilinə hücum zamanı da 2 nəfər ölüb, digərləri yaralanıb.

Şimal-qərbdəki Şeyx Rizvan məhəlləsində isə “Acur” binasına endirilən hava zərbəsi nəticəsində bir neçə nəfər həyatını itirib. Digər tərəfdən, İsrail aviasiyası eyni məhəllədə bir yaşayış evini də bombalayıb.

İsrail ordusunun sözçüsü bildirib ki, Qəzza sakinləri üçün müvəqqəti keçid dəhlizi açılıb. Onun sözlərinə görə, “Cənuba keçidi asanlaşdırmaq məqsədilə Salahəddin küçəsi üzərindən dəhliz 48 saat ərzində – çərşənbə günündən cümə gününə qədər açıq qalacaq”.

İsrail ordusunun hesablamasına görə, təxminən 400 min fələstinli artıq Qəzza şəhərini tərk edib. Müharibədən əvvəl şəhərin əhalisi 1 milyon nəfərə yaxın idi. Son günlər minlərlə insanın məcburi köçü kütləvi şəkildə davam edir.

“Vafa”nın açıqlamasına əsasən, son iki gündə təkcə hava zərbələri nəticəsində 108 nəfər həlak olub. Onlardan 93 nəfəri şimalda, 9 nəfəri mərkəzdə, 6 nəfəri isə cənub bölgəsində öldürülüb.
Qəzzada 2023-cü il 7 oktyabrdan başlayan İsrail əməliyyatları nəticəsində indiyədək 64 mindən çox insan həlak olub, 165 mindən artıq insan yaralanıb. Ölənlər arasında çoxlu sayda qadın və uşaq var.