BAKI, AzerVoice, Nailə Babazadə

İsrailin hücumları və mühasirəsi səbəbindən Qəzza zolağında aclıq fəlakəti yaşanır. Son 24 saat ərzində 3 fələstinli daha aclıq və qidalanma çatışmazlığı səbəbilə həlak olub.

AzerVoice xəbər verir ki, bu barədə Qəzzadakı Fələstin Səhiyyə Nazirliyi yazılı açıqlama yayıb. Bildirilib ki, aclıq və qida çatışmazlığı səbəbindən ölənlərin sayı 7 oktyabr 2023-cü ildən bu yana 425-ə yüksəlib. Onlardan 145-i uşaqdır.

BMT-nin dəstəklədiyi İnteqrasiya olunmuş Qida Təhlükəsizliyi Faza Təsnifatı (IPC) 22 avqust tarixində Qəzza şəhərində "aclq vəziyyəti" elan edib. Həmin tarixdən bu günə qədər bölgədə 30-u uşaq olmaqla 147 nəfər aclıq səbəbilə həyatını itirib.

IPC-nin hesabatında, sentyabr ayının sonuna qədər aclığın Deyr əl-Bələh və Xan Yunis şəhərlərinə də yayılacağı xəbərdarlığı yer alıb.

İsrailin sərt blokadası, hücumları və humanitar yardımları məhdudlaşdırması nəticəsində Qəzza zolağı dərin humanitar fəlakət yaşayır. Bölgədə su, dərman, tibbi avadanlıq və gigiyena vasitələri tapılmır.

Ən çox uşaqların həyatına təsir edən aclıq, bölgədə ölümlərin artmasına səbəb olur. Yerli və beynəlxalq qurumlar İsrailin aclığı və susuzluğu bir silah kimi istifadə etdiyini bəyan edir.

İsrail ordusu Qəzzanın sosial infrastrukturunun 88 faizini dağıdıb. Eyni zamanda, sürgün əmrləri ilə milyonlarla fələstinlini evlərindən didərgin salaraq, vaxtaşırı mülki sığınacaqları bombalayır.

Qəzzada əhalinin sayı təxminən 2,3 milyon nəfərdir. Onlardan təxminən 2 milyonu İsrailin hücumları və zorakı köçürülməsi nəticəsində dəfələrlə yerindən edilib.

Əsas ehtiyac vasitələrindən məhrum olan fələstinlilər, çoxsaylı gigiyena problemi ilə üz-üzə qalan məktəblərdə, çadırlarda və sığınacaqlarda yaşamağa məcbur olublar. İnfeksion xəstəliklər isə sürətlə yayılır.

İsrail ordusu isə gündəlik hava və artilleriya hücumları ilə, məcburi köçkünlərin yaşadığı çadırları və mülki obyektləri hədəfə almaqda davam edir.