BAKI, AzerVoice, Nərmin Ağayeva

Şimaldan cənuba yeni köç ehtimalı demək olar ki, mümkün deyil.

AzerVoice xəbər verir ki, Qəzza hökuməti İsrailin şimal bölgələrindən cənuba 1,3 milyon insanı köçürmək planının həyata keçirilməsinin faktiki olaraq mümkünsüz olduğunu açıqlayıb. Hökumətin Media Bürosundan verilən məlumata görə, cənub şəhərlərinin bu qədər insanı yerləşdirəcək potensialı yoxdur, sığınacaq çatışmazlığı isə 96 faizi keçib.

Bəyanatda bildirilib ki, İsrail ordusunun elanına baxmayaraq, indiyədək yalnız 10 min çadırın Qəzzaya daxil olmasına icazə verilib. Halbuki, real ehtiyac 250 min çadır və karvan təşkil edir. Bu, tələbatın cəmi 4 faizinə bərabərdir. Bundan əlavə, İsrailin beynəlxalq yardım təşkilatlarının işinə qoyduğu məhdudiyyətlər səbəbindən sərhəd-keçid məntəqələrində sığınacaq materiallarının çatışmazlığı yüz minlərlə köçkün üçün vəziyyəti daha da ağırlaşdırır.

Açıqlamada qeyd olunub ki, hazırda İsrail ordusu Qəzza zolağının təxminən 77 faizinə nəzarət edir. Bununla yanaşı, Daxili İşlər Nazirliyi İsraili yaşayış məntəqələrini yüksək partlayıcılarla dağıtmaqda, dinc insanları aclıq və qətliamla təhdid edərək məcburi köçə məruz qoymaqda ittiham edib. Nazirlik fələstinliləri “yenidən eyni səhvi təkrarlamamağa” və evlərini tərk etməməyə çağırıb.

Qeyd edək ki, avqustun 8-də İsrail Təhlükəsizlik Kabineti Qəzza şəhərinin işğalı planını təsdiqləyib. Baş nazir Benyamin Netanyahu bütün Qəzza zolağının işğalını hədəflədiklərini bəyan edib. İsrail mediası bu planın sentyabr ayından tez reallaşdırılmasının gözlənilmədiyini bildirib. Avqustun 16-da isə ordu sözçüsü Aviçay Adraee evsiz qalan fələstinlilərə çadır və digər sığınacaq avadanlıqlarının BMT və beynəlxalq təşkilatlar vasitəsilə Karm Əbu Səlim sərhəd-keçid məntəqəsindən daxil ediləcəyini açıqlayıb.