BAKI, AzerVoice, Səməd Əyyubov
Suriyanın prezidenti Əhməd əş-Şəraa bəyan edib ki, ölkənin birliyinə hərbi yolla nail olmaq qəbuledilməzdir.
AzerVoice xəbər verir ki, dövlət başçısının sözlərinə görə, Suriya artıq uzunmüddətli müharibədən yorulub və birliyin yalnız qarşılıqlı razılaşmalar yolu ilə təmin olunması mümkündür.
Şəraa vurğulayıb ki, bəzi qüvvələr ölkəni parçalamaq niyyətindədir, lakin buna imkan verilməyəcək. Onun sözlərinə görə, müəyyən qruplar İsrail və digər regional güclərin dəstəyi ilə hakimiyyəti ələ keçirməyə çalışır, lakin bu cəhdlər nəticəsiz qalacaq.
Prezident, iyul ayında cənubdakı Süveyda vilayətində baş verən qarşıdurmalar zamanı cinayətlərin yalnız silahlı dəstələr tərəfindən deyil, həm də təhlükəsizlik qüvvələri və hərbçilər tərəfindən törədildiyini etiraf edib. O, məsul şəxslərin dövlət tərəfindən cəzalandırılacağını bildirib.
Şəraa həmçinin İsraili Süveyda hadisələrinə müdaxilə etməkdə və Suriyanı zəiflətməyə çalışmaqda ittiham edib.
O, əlavə edib ki, Dəməşq martın 10-da əldə olunmuş razılaşmaya əsasən şimal və şimal-şərqdəki kürd qüvvələri ilə danışıqları davam etdirir. Razılaşmaya görə, kürd dəstələrinin Suriya ordusuna inteqrasiyası nəzərdə tutulsa da, hələlik konkret addımlar atılmayıb.
Şəraa bildirib ki, kürdlər idarəetmədə mərkəzləşmənin ləğvini tələb edirlər, lakin Dəməşq bu mövqeyi qəbul etmir.
Xatırladaq ki, 13 iyul tarixində Suriyanın Suveyda vilayətində ərəb qəbilələrinin döyüşçüləri ilə druz dəstələri arasında qarşıdurmalar baş verib. İyulun 15-də Suriya ordusu vilayətin inzibati mərkəzinə daxil olaraq, bölgədə sabitliyi təmin etmək üçün əməliyyatlara başlayıb. Ardınca İsrail, druz əhalisini qorumaq məqsədi ilə Suriyanın hərbi kolonlarını hədəfə almağa başladığını bəyan edərək hava hücumları həyata keçirməyə başlayıb.
16 iyul tarixində İsrail Hərbi Hava Qüvvələri Dəməşq və onun ətrafındakı bir sıra strateji obyektlərə, o cümlədən Suriya ordusunun Baş Qərargah kompleksinə, Əbu-Rummana rayonundakı Prezident Sarayına və paytaxtın qərbində yerləşən Mezze hərbi hava bazasına hava zərbələri endirib. Bu zərbələr nəticəsində Suriya təhlükəsizlik qüvvələrinin beş əməkdaşı həlak olub.
Məlumat üçün bildirək ki, druzlar – Suriya, Livan, İsrail və İordaniyada yaşayan, ərəb dilli və dini baxımdan özünəməxsus etnokonfessional qrupdur. Suriyada təxminən 700 min druz yaşayır ki, bu da kürdlər və ələvilərdən sonra ölkədəki üçüncü ən böyük dini-etnik azlıqdır.