BAKI, AzerVoice, Səməd Əyyubov

İsrail ordusu Qəzza zolağının şimalında HƏMAS tərəfindən istifadə olunan 7 kilometrlik yeraltı tuneli bağladığını açıqlayıb.

AzerVoice xəbər verir ki, bu barədə ordunun rəsmi saytında yayımladığı bəyanatda deyilir.

Bildirilib ki, Beyt Hanun bölgəsində aparılan əməliyyat zamanı tunel xəttinə 20 min kubmetrdən çox izolyasiya materialı doldurulub.

Qeyd edək ki, HƏMAS 2006-cı ildən Qəzza zolağına nəzarəti ələ aldıqdan sonra bütün bölgəni bir-birinə bağlayan geniş yeraltı tunel şəbəkəsi qurub. Sahil bölgəsinin uzunluğu cəmi 45 km, eni isə 6–14 km arasında dəyişməsinə baxmayaraq, tunellərin ümumi uzunluğunun müharibədən əvvəl ən az 500 km olduğu təxmin edilirdi.

Bu tunellər HƏMAS tərəfindən qaçaqmalçılıq və hərbi məqsədlərlə, o cümlədən 2023-cü il oktyabrın 7-də İsrailin cənubuna edilən hücum zamanı istifadə edilib. Həmin hücumda təxminən 1 200 nəfər həlak olmuş, 250 nəfər isə girov götürülərək Qəzzaya aparılmışdı.

İsrailin hərbi əməliyyatları nəticəsində HƏMAS-ın gücü xeyli zəifləsə də, təşkilat hələ də nəzarətində olan ərazilərdə tunellərdən əsgər daşınması, silah və ərzaq ehtiyatının saxlanması üçün istifadə edir. Bu tunellər, HƏMAS-ın qərargahlarını və möhkəmləndirilmiş sığınacaqları bir-birinə bağlayır. İsrail bəzi girovların Qəzza şəhəri və mərkəzdəki qaçqın düşərgələrinin altındakı tunellərdə saxlanıldığını iddia edir.

Bağlanan tunel, İsrail qüvvələrinin artıq uzun müddətdir nəzarət etdiyi sərhədə yaxın ərazidə yerləşir.