BAKI, AzerVoice, Nərmin Ağayeva

İsrailin hava hücumları Nasser xəstəxanasında fəlakət yaradıb.

AzerVoice xəbər verir ki, İsrail ordusunun Qəzza zolağının cənubundakı Xan Yunis şəhərinə endirdiyi hava zərbələri nəticəsində şəhərin kanalizasiya sistemi zədələnib, Nasser xəstəxanası kanalizasiya suları altında qalıb.

Hadisə zamanı xəstəxananın təcili yardım otağı və bəzi palatalar su basıb. Həkim və tibb bacıları sel suları içində xəstələrə yardım göstərməkdə çətinlik çəkiblər. Xəstəxananın Daxili Xəstəliklər Şöbəsinin müdiri Xalid Əhməd bildirib ki, bəzi xəstələr oksigen cihazına bağlı vəziyyətdədir və onların köçürülməsi mümkün deyil.

Əhmədin sözlərinə görə, kanalizasiya şəbəkəsi İsrail ordusunun “qırmızı zona” kimi işarələdiyi ərazidə yerləşir və bu səbəbdən təmir imkansızdır. O, vəziyyəti “birbaşa təhlükə” kimi dəyərləndirib və beynəlxalq təşkilatları təcili müdaxiləyə çağırıb.

Nasser xəstəxanası Qəzzanın cənubunda yüz minlərlə insana xidmət edən yeganə tibb müəssisəsidir. 7 oktyabr 2023-dən bəri İsrailin hücumları nəticəsində Qəzzada səhiyyə infrastrukturu ciddi ziyan görüb, xəstəxanalar məqsədli şəkildə hədəf alınıb.