BAKI, AzerVoice, Nərmin Ağayeva
İsrail ordusunun Qəzza şəhərində Şifa xəstəxanası yaxınlığında jurnalistlərin çadırına hücumu nəticəsində beş jurnalist, o cümlədən “Əl-Cəzirə” müxbirləri Ənəs əl-Şərif və Məhəmməd Qurayka həlak olub.
AzerVoice xəbər verir ki, xəstəxana rəsmiləri hücumun məqsədyönlü şəkildə jurnalistləri hədəf aldığını bildiriblər.
İsrail ordusu Ənəs əl-Şərifin öldürüldüyünü təsdiqləyərək onu “HƏMAS hüceyrə lideri” olmaqda ittiham edib. Lakin “Əl-Cəzirə” və Fələstin tərəfi bu iddiaları rədd edərək hadisəni mətbuat azadlığına qarşı açıq hücum kimi qiymətləndirib. Hücum nəticəsində fotojurnalistlər İbrahim Zahir, Mömin Alive və Məhəmməd Nəvfəl də həyatını itirib, bir neçə jurnalist yaralanıb.
Qeyd edək ki, 2023-cü il oktyabrın 7-dən bəri Qəzzada İsrail hücumları nəticəsində öldürülən jurnalistlərin sayı 237-yə çatıb. Beynəlxalq təşkilatlar hadisəni “müharibə cinayəti” adlandıraraq məsul şəxslərin mühakimə olunmasına çağırıb.