BAKI, AzerVoice, Zeynəb Raminqızı
Qəzzada aclıq və dərman çatışmazlığı səbəbindən humanitar böhran dərinləşir.
AzerVoice xəbər verir ki, bu barədə Fələstin Səhiyyə Nazirliyi məlumat yayıb.
Bildirilib ki, Qəzza zolağında aclıq və qidalanma çatışmazlığı səbəbindən son 24 saatda daha 5 nəfər həyatını itirib. Bununla birlikdə aclıqdan ölənlərin ümumi sayı 93-ü uşaq olmaqla, 180 nəfərə çatıb.
Nazirliyin “Facebook” hesabında paylaşılan məlumata görə, humanitar böhran ərzaq və tibbi ləvazimat çatışmazlığı fonunda getdikcə dərinləşir. Rəsmilər beynəlxalq ictimaiyyət və yardım təşkilatlarını təcili müdaxiləyə çağırır.
Fələstin mediası xəbər verir ki, bu gün səhər saatlarından etibarən İsrailin Qəzzanın müxtəlif bölgələrinə endirdiyi hava zərbələri nəticəsində azı 34 nəfər həlak olub. Onlardan 17-si yardım almağa çalışan mülki şəxslər olub.
Səhiyyə Nazirliyi əlavə edib ki, bölgədə "kəskin yumşaq iflic" və "Giyen-Barre sindromu" kimi halların sayında artım müşahidə olunur. Qeyd olunur ki, bu xəstəliklər qidalanma çatışmazlığı və qeyri-adi infeksiyalarla əlaqəlidir. Artıq bu sindromdan 3 ölüm halı qeydə alınıb.
Aparılan tibbi testlər, bölgədə poliomielit xaricində müxtəlif bağırsaq viruslarının yayıldığını göstərib. Bu, Qəzzada yoluxucu xəstəliklərin nəzarətsiz şəkildə yayıldığını ortaya qoyur.
BMT-nin son açıqlamasına görə, Qəzza zolağı faktiki olaraq aclıq astanasındadır. İsrail qüvvələrinin bölgəyə gedən bütün sərhəd-keçid məntəqələrinə nəzarət etməsi və humanitar yardımların girişinə aylarla qismən və ya tam şəkildə mane olması, böhranı daha da ağırlaşdırır.
Bəzi ərəb və xarici ölkələr Qəzzaya havadan yardım göndərməyə çalışsa da, beynəlxalq təşkilatlar bu üsulun çox az miqdarda yardım daşıya bilməsi və yüksək maliyyətli olması səbəbindən qeyri-effektiv olduğunu bildirir.
