BAKI, AzerVoice, Nailə Babazadə
Birləşmiş Ərəb Əmirlikləri (BƏƏ) və İordaniya, bəzi Avropa ölkələrinin dəstəyi ilə İsrailin tətbiq etdiyi blokada səbəbilə aclıqla mübarizə aparan Qəzza zolağına havadan humanitar yardım çatdırıb.
AzerVoice xəbər verir ki, BƏƏ Xarici İşlər Nazirliyinin yaydığı yazılı məlumata görə, BƏƏ və İordaniyanın təşəbbüsü ilə Fransa, Almaniya, İtaliya və İspaniyadan olan 7 təyyarə Qəzzaya havadan yardım yükü endirib.
Bu çərçivədə BƏƏ-nin xarici işlər naziri Abdullah bin Zayid ilə İordaniyalı həmkarı Eymən əs-Safədi telefon danışığı apararaq, Qəzzadakı son vəziyyəti və yardım fəaliyyətlərində birgə koordinasiyanın gücləndirilməsi yollarını müzakirə ediblər.
Qeyd edək ki, İsrail ordusu ötən cümə günündən etibarən bəzi xarici ölkələrin Qəzza zolağına havadan yardım göndərməsinə icazə verdiyini açıqlamışdı.
Bununla belə, daha əvvəl paraşütlə havadan atılan bəzi yardım paketlərinin dənizə düşməsi və ya birbaşa mülki vətəndaşların üzərinə düşərək ölümlərə səbəb olması ciddi narahatlıqlara səbəb olmuşdu. Aclıq içində olan əhali bu səbəblə sahillərə axın etmiş, yardımın bu formada paylanması tənqid olunmuşdu.
İsrailin son günlərdə məhdud sayda hava yardımına icazə verməsi isə Fələstinlilər tərəfindən “alçaldıcı, görüntü üçün və siyasi teatr” kimi qiymətləndirilib.
Hazırda İsrailin hərbi hücumları və sərt blokadası altında olan Qəzza zolağında vəziyyət kritik həddə çatıb. Bölgədə su, dərman, tibbi avadanlıq və gigiyena vasitələri tapılmır, aclıq geniş yayılıb.
Ən çox təsirə məruz qalanlar arasında uşaqlar da var. 7 oktyabr 2023-cü ildən bəri Qəzzada aclıq səbəbilə 92-si uşaq olmaqla ümumilikdə 162 nəfər həyatını itirib.
Həm yerli, həm də beynəlxalq qurumlar İsrailin “aclıq və susuzluğu silah olaraq istifadə etdiyini” bildirirlər.