BAKI, AzerVoice

İsrail ordusu Qəzza şəhəri və ətraf bölgələrdəki fələstinlilərə yeni hərbi əməliyyat barədə xəbərdarlıq edib.

AzerVoice xəbər verir ki, bu barədə ordu sözçüsü Avixay Edrinin X sosial şəbəkəsində etdiyi paylaşımda bildirib.

O, Qəzza şəhəri, Cəbəliyə və digər ərazilərdə yaşayan sakinləri dərhal cənuba, Xan Yunisin qərbindəki Mavasi bölgəsinə getməyə çağırıb.

Edri qeyd edib ki, İsrail qüvvələri bu bölgələrdə çox güclü şəkildə hərbi əməliyyatlar aparır və bu əməliyyatlar daha da genişlənəcək, şiddətlənəcək və “terror təşkilatlarının gücünü məhv etmək məqsədi daşıyacaq”.

Bu arada İsrail ordusunun keçən gecə Qəzza zolağındakı Xan Yunis və Nusayrat bölgələrinə endirdiyi hava zərbələri nəticəsində azı 10 fələstinli həlak olub, bir neçə nəfər isə yaralanıb. Səhiyyə mənbələri bildirir ki, Xan Yunisin qərbində, Mavasi bölgəsində yerləşən çadırın bombalanması nəticəsində dörd fələstinli – iki qadın, bir uşaq və daha bir nəfər şəhid olub, çox sayda insan yaralanıb.

Qəzzanın mərkəzində, Nusayrat düşərgəsinin şimal-şərqindəki Vadi Qəzza bölgəsində isə bir fələstinli İsrail əsgərləri tərəfindən güllələnərək öldürülüb. Eyni zamanda, Qəzza şəhərinin mərkəzində, Samir yolayrıcısı yaxınlığında İsrail bombardmanı nəticəsində bir ailədən beş nəfər – qadın və uşaqlar da daxil olmaqla həlak olub.