BAKI, AzerVoice

İsrail və HƏMAS-ın nümayəndələri yaxın günlərdə Qətərin vasitəçiliyi ilə Qəzza zolağında münaqişənin nizamlanması ilə bağlı dolayı danışıqlar aparmağı planlaşdırırlar.

AzerVoice-un məlumatına görə, bu barədə Qətər hökumətinin başçısı və xarici işlər naziri şeyx Məhəmməd bin Əbdürrəhman Əl Tani məlumat verib.

“Qətər ümid edir ki, İsrail və HƏMAS nümayəndələri arasında Qəzzada atəşkəsin bərpası ilə bağlı dolayı danışıqlar bir neçə gün ərzində yenidən başlayacaq. Regionda baş verən son hadisələri nəzərə alaraq ümid edirik ki, İsrail İranla əldə olunan atəşkəsdən Qəzzaya hücumları gücləndirmək üçün istifadə etməyəcək” – deyə o, Dohada keçirilən mətbuat konfransında bildirib.

Əl Tani əlavə edib ki, Qətər və Misir Qəzza zolağında münaqişənin həlli istiqamətində vasitəçilik səylərini davam etdirir. Lakin onun sözlərinə görə, “İsrailin İrana qarşı son təcavüzü Qəzzada atəşkəsə nail olmaq üçün görülən səyləri pozdu”.

Xatırladaq ki, martın 18-də İsrail ordusu yanvar ayında əldə edilmiş atəşkəs rejimini pozaraq Qəzza zolağında hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raunduna baxmayaraq, tərəflər yeni atəşkəs şərtləri üzrə razılığa gələ bilməyib.