BAKI, AzerVoice

İsrailin Baş naziri Benyamin Netanyahu bildirib ki, İrana qarşı həyata keçirilən hücum zamanı gözlənilməzlik amili İsrailə böyük uğurlar qazandırıb, lakin gələcəkdə İran tərəfindən güclü cavab zərbələrinin olması mümkündür.

AzerVoice xəbər verir ki, bu barədə o, baş nazirliyin yaydığı video-müraciətində bəyan edib.

Netanyahu xatırladıb ki, ötən il Livanda “Hizbullah”ın üzvlərinə məxsus peycer cihazlarının kütləvi şəkildə partladılması əməliyyatı da eyni taktika ilə aparılmışdı.

“Gözlənilməzlik — uğurun əsas faktorudur. Bunu peycer hadisəsində gördük. Bunu bu gün də görürük… Bu, şübhəsiz, İranda xaos vəziyyəti yaradıb. Amma onu da nəzərə almalıyıq ki, bizə qarşı da hücumlar ola bilər və bu, çox ciddi zərbə dalğası şəklində ola bilər” — deyə, Netanyahu xəbərdarlıq edib.

Xatırladaq ki, İsral Hərbi Hava Qüvvələri bugün səhər saatlarında İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib. Eyni zamanda İran tərəfi İsrailə cavab hücumunun həyata keçiriləcəyini bildirir.