BAKI, AzerVoice

İsrail Qəzza zolağında HƏMAS-a qarşı mübarizə üçün bir sıra fələstinli klanları öz tərəfinə çəkib.

AzerVoice xəbər verir ki, bunu İsrailin Baş naziri Benyamin Netanyahu etiraf edib.

"Qüvvələrimizin təhlükəsizliyi naminə biz HƏMAS-a qarşı olan Qəzzadakı bəzi klanları işə cəlb etdik. Bu yalnız xeyir gətirir — əsgərlərimizin həyatını xilas edir" — deyə, o, hökumət başçısının ofisi tərəfindən yayılan bəyanatda bildirib.

Bəyanatda qeyd olunur ki, İsrail Qəzzada "HƏMAS adlı terror təşkilatını tamamilə məhv etmək məqsədinə nail olmaq üçün ağılla, əzmlə və təhlükəsizlik orqanlarının tam dəstəyi ilə fəaliyyət göstərir".

"İsrail tam qələbəyə qədər bütün cəbhələrdə fəaliyyətini davam etdirəcək" — deyə, bəyanatda qeyd olunub.

Əvvəllər İsrailin sabiq müdafiə naziri, "Bizim Evimiz İsrail" partiyasının lideri və Knesset (parlament) üzvü Aviqdor Liberman bəyan etmişdi ki, İsrail hökuməti Qəzza sektorunda HƏMAS-a müxalif olan fələstinli qruplaşmalara silah ötürür. O, Kan dövlət televiziyasına müsahibəsində iddia etmişdi ki, "İsrail Qəzzada İŞİD-lə əlaqəsi olan cinayətkar qruplaşmalara silah ötürür". Deputatın sözlərinə görə, "bu addım Nazirlər Kabinetinin razılığı ilə yox, baş nazirin göstərişi ilə və İsrailin Ümumi Təhlükəsizlik Xidmətinin təşəbbüsü ilə həyata keçirilir".