Bakı. AzerVoice:
İsrail əsir mübadiləsi razılaşmasının bir hissəsi olaraq Qəzzada hücumlara son qoymağa razılıq verdiyi xəbərini təkzib edib.
AzerVoice xəbər verir ki, bu barədə İsrail Baş Nazirlik ofisindən məlumat verilib. Məlumatda İsrailin keçən ay Həmas-a təqdim etdiyi əsir mübadiləsi razılaşması təklifi ilə bağlı Kanal 12 televiziyası tərəfindən hazırlanan xəbərlərin "natamam və ictimaiyyəti yanıltıcı olduğu" bildirilib.
Həmçinin, verilən açıqlamada, İsrailin “bütün məqsədlərinə çatmadan” Qəzzaya hücumlarına son qoymağa razı olduğu iddiasının “tamamən yalan olduğu” bildirilib.
Qeyd edək ki, Kanal 12 televiziyasının xəbərində İsrailin Qəzzaya hücumlarını "daimi olaraq dayandırması" ilə bağlı təklif irəli sürdüyü iddia edilmişdi.
Onu da əlavə edək ki, Bayden mayın 31-də Ağ Evdəki çıxışında İsrailin üç mərhələdən ibarət yeni atəşkəs təklifi təqdim etdiyini bildirmişdi.
İsrailin baş naziri Benyamin Netanyahu isə Qəzza zolağında bütün məqsədlərinə çatana qədər müharibənin davam etdirilməsində israrlı olduğunu bildirmişdi.
Həmas həmçinin İsrailin təqdim etdiyi və ABŞ prezidenti Co Baydenin açıqladığı “daimi atəşkəs, işğalçı qüvvələrin Qəzza zolağından çıxarılması, yenidənqurma və əsir mübadiləsi” ilə bağlı elan etdiyi təkliflərə müsbət baxdıqlarını bildirmişdi.
Nəhayət, İsrail prezidenti İsaak Hersoq Baydenin Qəzza zolağında atəşkəs ilə bağlı elan etditi təklifin Baş nazir Benyamin Netanyahu tərəfindən qəbul ediləcəyi təqdirdə ona dəstək verəcəyini bəyan etmişdi.
