BAKI, AzerVoice
Bu gün Qətərin paytaxtı Dohada HƏMAS və İsrail arasında atəşkəs və girovların azad olunması üçün dolayı danışıqların yeni raundu başlayır.
AzerVoice xəbər verir ki, bu barədə diplomatik mənbə məlumat verib.
Mənbənin sözlərinə görə, vasitəçilər HƏMAS-a danışıqların bu gün Dohada başlanacağını bildiriblər. HƏMAS-ın danışıqlar heyətinə Xəlil əl-Həyyə rəhbərlik edir və texniki qruplarla birlikdə hal-hazırda Dohadadırlar və ciddi danışıqlara hazırdırlar.
Xatırladaq ki, İsrailin baş naziri Benyamin Netanyahu ötən gün bəyan edib ki, bazar günü Qətərə qeyri-birbaşa danışıqlar aparmaq üçün heyət göndərəcək. O bildirib ki, bu danışıqlar Qəzzada atəşkəs razılaşmasına nail olmaq məqsədi daşıyır, lakin HƏMAS-ın son tələblərinin İsrail üçün qəbulolunmaz olduğunu vurğulayıb.
“Bizə ötən gecə HƏMAS-ın Qətər təklifinə dəyişiklik etmək niyyətində olduğu bildirildi və bu dəyişikliklər İsrail üçün qəbulolunmazdır”, - Netanyahunun ofisinin yaydığı bəyanatda deyilir.
Bu arada, bu gün səhər saatlarından bəri İsrailin Qəzzaya etdiyi hava hücumları nəticəsində 23 fələstinli həlak olub, bir neçə nəfər isə yaralanıb. Fələstin mətbuatının verdiyi məlumata görə, öldürülənlərdən 12-si Qəzza şəhərinin şimalındakı Şeyx Ridzvan məhəlləsindəndir. Həmçinin, həmin bölgədəki iki evə edilən hücum nəticəsində 20 nəfər yaralanıb.
