BAKI, AzerVoice

Türkiyədə məşhur “Leman” adlı satirik jurnalın 26 iyun tarixli buraxılışında Hz. Məhəmməd peyğəmbərin təhqiramiz təsvirinə yer verilməsi böyük ictimai qınağa səbəb olub. AzerVoice Jurnal barəsində "dini dəyərləri açıq-aşkar aşağılama" ittihamı ilə İstanbul Cümhuriyyət Baş Prokurorluğu tərəfindən cinayət işi açılıb və məsələ ilə bağlı 4 nəfər barəsində həbs qərarı verilib.

Türkiyənin daxili işlər naziri Ali Yerlikaya bildirib ki, karikaturanı çəkən şəxs – D.P. adlı rəssam təhlükəsizlik qüvvələri tərəfindən saxlanılıb. Prokurorluq, eyni zamanda jurnalın müvafiq buraxılışının topladılması və sosial media hesablarına girişin məhdudlaşdırılması üçün tədbirlər başladıldığını açıqlayıb.

Jurnal binası qarşısında aksiya keçilib

Sözügedən karikatura sosial şəbəkələrdə yayıldıqdan sonra axşam saatlarında bir qrup insan İstanbulun Beyoğlu rayonunda yerləşən “Leman” jurnalının redaksiyasının önünə toplaşaraq etiraz aksiyası keçirib. Bəzi etirazçılar polis səddini yararaq ofisə daxil olublar.

Ədliyyə naziri Tunç: Heç bir azadlıq inancı alçaltmaq haqqını vermir

Türkiyənin ədliyyə naziri Yılmaz Tunç da hadisəyə münasibət bildirib. O qeyd edib ki, jurnalın bu hərəkəti Türk Cəza Məcəlləsinin 216-cı maddəsi çərçivəsində “dini dəyərləri alçaltma” cinayəti olaraq qiymətləndirilib.
“Peyğəmbərimizin karikaturalaşdırılması nəinki dini dəyərlərimizə, həm də ictimai barışa ciddi zərər verir. Milyonlarla müsəlmanın inancını ayaq altına atan bu təxribatçı addıma qarşı hüquqi tədbirlər dərhal görüləcək.”-deyə nazir vurğulayıb.

Həbs qərarı kimlərə şamil olunub?

Prokurorluq tərəfindən verilən açıqlamaya görə, həbs qərarı karikatura müəllifi ilə yanaşı, jurnalın 2 baş redaktoru və məsul yazı işləri müdiri olmaqla cəmi 4 nəfəri əhatə edir.

Leman jurnalından açıqlama
Jurnal redaksiyası yayımladığı açıqlamada karikaturada Peyğəmbər təsvirinin olmadığını və bu vəziyyətin qəsdən təhrif edildiyini bildirib:
“Bizi bu şəkildə günahlandırmaq üçün çox pis niyyətli olmaq lazımdır. Rəsmdəki şəxsin Hz. Məhəmməd olmadığını açıq şəkildə bəyan edirik. Karikatura, İsrail tərəfindən öldürülən bir müsəlmanı simvolizə edir və zülmə qarşı müqaviməti əks etdirir.”

Jurnal həmçinin qeyd edib ki, daha əvvəl Fələstin Xüsusi Sayıları, Mavi Marmara qətliamı və digər vicdanı mövzularda yüzlərlə dəstək karikaturası yayımlayıblar və “vicdan və inancımızı sual altına alma haqqınız yoxdur” deyə vurğulayıblar.