BAKI, AzerVoice , Nailə Babazadə

İstanbul Baş Prokurorluğu elektron pul və ödəniş platforması VEPARA haqqında “cinayət yolu ilə əldə edilmiş əmlak dəyərlərinin yuyulması” maddəsi üzrə istintaqa başlayıb. 6 bölgədə keçirilən əməliyyat çərçivəsində 31 şübhəli barəsində saxlanılma qərarı verilib.

AzerVoice xəbər verir ki, Papara, Payfix, IQ Money və PAYCO əməliyyatlarından sonra elektron ödəniş şirkətlərinə yönəlik çirkli pul araşdırmaları davam edir.

İstanbul Respublika Baş Prokurorluğunun Terrorçuluğun Maliyyələşdirilməsinin Qarşısının Alınması və Pul Yuyulması Cinayətləri üzrə İstintaq Bürosu, VEPARA Elektron Pul və Ödəniş Xidmətləri Sistemi şirkəti barədə “əmlak dəyərlərinin yuyulması” cinayətləri üzrə istintaq başladıb.

İstintaq çərçivəsində Türkiyə Cümhuriyyəti Mərkəzi Bankının (TCMB) yoxlama hesabatı və MASAK təhlillərində, qeyri-qanuni mərc və qeyri-qanuni forex/fırıldaqçılıq fəaliyyətlərindən əldə olunan cinayət gəlirlərinin elektron pul və ödəniş xidmətləri göstərən qurumlar vasitəsilə sistemli şəkildə pul köçürülməsinə aracılıq edilərək maliyyə sisteminə daxil edildiyi, sonradan isə çoxsaylı yerli və xarici şirkətlər üzərindən yuyulmağa cəhd edildiyi müəyyən edilib.

İstintaqın dərinləşdirilməsi nəticəsində təşkilati struktur daxilində proqram mühəndisi, informasiya texnologiyaları (İT) əməkdaşı və layihə meneceri qismində fəaliyyət göstərən bəzi şübhəlilərin; qeyri-qanuni mərc və qeyri-qanuni forex/fırıldaqçılıq fəaliyyətlərindən əldə olunan cinayət gəlirlərinin elektron pul infrastrukturları, proqram təminatı sistemləri və maliyyə yönləndirmə mexanizmləri vasitəsilə köçürülməsində və gizlədilməsində fəal iştirak etdikləri, bununla da “pul köçürülməsinə aracılıq etmə” cinayətini törətdikləri müəyyən olunub.

Bu çərçivədə aparılan istintaqın nəticəsi olaraq; təşkilat iyerarxiyası daxilində əməliyyat, inzibati və texniki proseslərdə aktiv rol oynadığı, cinayət gəlirlərinin proqram təminatı infrastrukturları üzərindən yönləndirilməsi, elektron pul hesablarının idarə edilməsi və maliyyə axınlarının gizlədilməsi fəaliyyətlərində iştirak etdiyi dəyərləndirilən şübhəlilərə qarşı əməliyyat həyata keçirilib.

İstanbul, Ankara, Kastamonu, Tokat, Kocaeli və Bursa şəhərlərində İstanbul Bölgə Polis İdarəsinin Maliyyə Cinayətləri ilə Mübarizə Şöbəsi tərəfindən eyni vaxtda keçirilən əməliyyatlarda 31 şübhəli barəsində saxlanılma göstərişi verilib.

Şübhəlilərin təşkilatdaxili vəzifə və mövqelərinin dəqiqləşdirilməsi, maliyyə və rəqəmsal sübutların əldə edilməsi, cinayətdən əldə olunan gəlirlərin izinin sürülməsi və sübutların qorunması məqsədilə ünvanlarında axtarış və müsadirə tədbirləri həyata keçirilib.

İstintaqın; maliyyə təhlükəsizliyinin qorunması, cinayət gəlirlərinin iqtisadi sistemə daxil olmasının qarşısının alınması və təşkilati strukturun bütün tərəfləri ilə üzə çıxarılması məqsədilə çoxşaxəli şəkildə davam etdiyi bildirilib.