Bakı, AzerVoice. Avropa İttifaqı tərəfindən maliyyələşdirilən “Merlər Razılaşması – Şərq Tərəfdaşlığı” təşəbbüsü Azərbaycanda bələdiyyələr üçün yerli iqlim və enerji fəaliyyəti sahəsində mövcud imkanların artırılmasına yönəlmiş maarifləndirici tədbir təşkil edib.
AzerVoice xəbər verir ki, 10 fevral tarixində Bakıda keçirilən tədbirə bələdiyyələrin və milli qurumların təxminən 100 nümayəndəsi qatılıb. Görüşlər Avropa İttifaqının yerli səviyyədə iqlim və enerji öhdəliklərinin dəstəklənməsi üzrə daha geniş səyləri çərçivəsində baş tutub və enerji səmərəliliyi, iqlimə davamlılıq və dayanıqlı inkişaf istiqamətində fəaliyyət göstərmək istəyən şəhərləri bir araya gətirib.
Tədbirin əsas məqsədi təşəbbüsə qoşulmağı nəzərdən keçirən tərəflərə “Merlər Razılaşması”na üzvlüyün praktik mahiyyətini izah etmək olub. “Merlər Razılaşması – Şərq Tərəfdaşlığı” komandası şəhərlər üçün mövcud dəstək mexanizmlərini, o cümlədən Dayanıqlı Enerji və İqlim üzrə Fəaliyyət Planlarının hazırlanması üçün metodiki alətləri, irəliləyişin monitorinqi vasitələrini, layihə və texniki dəstəyi, eləcə də potensialın artırılmasına yönəlmiş proqramları təqdim edib.
Tədbirdə Şəki Şəhər İcra Hakimiyyəti başçısının müavini Səyyarə Musayeva, Mingəçevir Şəhər Bələdiyyəsinin sədri Anar İsmayılov və Moldovanın Ceadir-Lunqa şəhərinin meri Anatolii Topal təşəbbüsə qoşulma üzrə təcrübələrini bölüşüblər.
Bildirilib ki, Azərbaycanda təşəbbüs artıq konkret nəticələr verib. Mingəçevir “Merlər Razılaşması – Şərq Tərəfdaşlığı” çərçivəsində Dayanıqlı Enerji və İqlim üzrə Fəaliyyət Planının hazırlanmasına dəstək alan ilk şəhər olub. Həm Mingəçevir, həm də Şəki şəhərlərində bələdiyyə obyektlərində enerji auditləri aparılıb və şəhərlərə maliyyələşmə mənbələrinin müəyyənləşdirilməsi istiqamətində dəstək göstərilir. Şəkidə bu proses “Mounting Adapt” proqramı çərçivəsində konkret layihənin maliyyələşdirilməsinə də imkan yaradıb.
Eyni zamanda təşəbbüs çərçivəsində Enerji Günlərinin təşkili, yerli maraqlı tərəflərin cəlb olunması və ictimai məlumatlılığın artırılması istiqamətində tədbirlər həyata keçirilib. Energetika Nazirliyinin ekspertlərinin Şəkiyə səfəri zamanı kiçik su elektrik stansiyası, ənənəvi su dəyirmanları və tarixi abidələrə baxış keçirilib, iqlim, enerji və mədəni irsin dayanıqlı yerli inkişafa inteqrasiyası yerində qiymətləndirilib.
Tədbirin açılışında çıxış edən Avropa İttifaqının Azərbaycandakı səfiri Marijana Kunjundzic şəhərlərin iqlim və enerji sahəsində konkret nəticələrin əldə olunmasında mühüm rol oynadığını vurğulayaraq, bələdiyyələri təşəbbüsə qoşulmağa çağırıb.
Energetika Nazirliyinin Enerji Səmərəliliyi şöbəsinin müdiri Cavid Mikayılov isə bildirib ki, “Merlər Razılaşması – Şərq Tərəfdaşlığı” təşəbbüsü bələdiyyələr üçün enerji səmərəliliyi sahəsində real icra mexanizmləri təqdim edən vacib platformadır və nazirlik bu imkanlardan səmərəli istifadə olunmasını dəstəkləməyə davam edəcək.
Təşəbbüsün komanda rəhbəri Christophe Frering isə qeyd edib ki, tədbirlərin əsas məqsədi şəhərləri məlumatlı qərar qəbul etmək üçün zəruri bilik və praktiki alətlərlə təmin etməkdir.
