BAKI, AzerVoice
İsrail ordusu Qəzza zolağının müxtəlif bölgələrinə hücumlar təşkil edib.
AzerVoice xəbər verir ki, bu barədə Qəzzanın səhiyyə mənbələri məlumat yayıb.
Məlumata əsasən, hücumlar nəticəsində aralarında qadınlar, uşaqlar və yardım gözləyən mülki şəxslərin də olduğu azı 24 fələstinli həlak olub, onlarla insan yaralanıb.
İlk olaraq Qəzzanın Xan Yunis şəhərinin qərbində yerləşən əl-Mavasi bölgəsində məcburi köçkünlərin qaldığı çadıra edilən hava zərbəsində biri hamilə qadın və iki uşaq olmaqla beş nəfər ölüb.
Digər bir hücum isə Qəzza şəhərindəki Əhməd Yasin küçəsində qaçqınların sığındığı bir evə edilib. Hava hücumu nəticəsində beş nəfər həlak olub.
Eyni şəhərdə yardım gözləyən mülki şəxslərə açılan atəş nəticəsində bir nəfər daha öldürülüb.
Qəzza zolağının mərkəzində yerləşən Səlahəddin küçəsində, yardım paylanması üçün qurulmuş bir məkanda mülki şəxslərə qarşı edilən hücum zamanı isə iki nəfər ölüb, 16-sı ağır olmaqla 35 nəfər yaralanıb.
Qəzza şəhərindəki Şifa xəstəxanasından əldə edilən məlumata görə, şəhərin müxtəlif bölgələrinə təşkil edilən hava hücumları və mülki şəxslərə qarşı açılan atəş nəticəsində ölən 11 fələstinlinin cəsədi və 7 yaralı xəstəxanaya çatdırılıb.
