BAKI,AzerVoice

İsrailin Baş naziri Benyamin Netanyahu ABŞ-ın “ABC News” telekanalına verdiyi açıqlamada bildirib ki, İranın ali lideri Əli Xameneinin öldürülməsi bu ölkə ilə münaqişəni bitirə bilər.AzerVoice xəbər verir ki, Netanyahunun sözlərinə görə, İran liderinin aradan götürülməsi qarşıdurmanı daha da alovlandırmayacaq, əksinə, ona son qoyacaq. O, İranı “terror və dağıdıcı” fəaliyyətləri yaymaqda ittiham edərək bildirib ki, ABŞ-ın İsrailin İranın nüvə proqramını məhv etmək səylərinə dəstək verməsi ABŞ-ın öz maraqlarına uyğundur.

Netanyahu vurğulayıb: “Münaqişə nə qədər lazımdırsa, o qədər də davam edəcək. İranın yaratdığı təhdidlər ya birbaşa, ya da dolayı yollarla aradan qaldırılacaq.”

“İran sonsuz müharibə istəyir. Onlar bizi nüvə müharibəsinin astanasına sürükləyirlər. İsrailin atdığı addımlar bu təhlükəni önləməyə və təcavüzə son qoymağa yönəlib. Biz yalnız şər qüvvələrinə qarşı çıxaraq buna nail ola bilərik.”-deyə o qeyd edib.

Xatırladaq ki, 14 iyun cümə günündən etibarən İsrail və İran bir-birinə qarşı qarşılıqlı hava və raket zərbələri endirir. İsrail müxtəlif hərbi və strateji İran obyektlərini hədəf alarkən, İran da İsrailə qarşı yüzlərlə ballistik raketlə hücum edib. Bu hücumlar nəticəsində indiyədək azı 24 nəfərin həyatını itirdiyi bildirilir.