BAKI, AzerVoice
İranın hələ ki istifadə etmədiyi təhlükəli silah- Xürrəmşəhr hipersəs raketi münaqişənin gedişatını dəyişə bilər.
AzerVoice xəbər verir ki, İranın
İsrailə qarşı həyata keçirdiyi "Real Promise-3" əməliyyatı
çərçivəsində raket hücumları davam edir.
Hücumlar nəticəsində İsraildə ən azı 16 nəfər həlak olub, 200-dən
çox insan yaralanıb. İranın “Fəttah” və “İmad” kimi ballistik
raketlərlə vurduğu Təl-Əviv, Ramat Qan, Hayfa kimi şəhərlərdə böyük
dağıntılar müşahidə olunub. Lakin ekspertlərin diqqət çəkdiyi bir
məsələ var- İran hələ Xürrəmşəhr adlı qabaqcıl hipersəs ballistik
raketindən istifadə etməyib.
İsrailin baş naziri Benyamin Netanyahu İranın ballistik raket potensialının ölkəsi üçün ciddi təhlükə yaratdığını bildirib. O, ayda 300 raket istehsal edən Tehranın növbəti illərdə bu sahədə ciddi üstünlük qazana biləcəyini vurğulayıb. Bu isə Dəmir Qübbə kimi müdafiə sistemləri üçün əlavə təzyiq deməkdir.
İranın Xürrəmşəhr raketi 2000 kilometr uçuş məsafəsinə və 1800 kiloqramlıq döyüş başlığına malikdir. Hərbi analitiklər bu raketin İsrailin strateji obyektlərini hədəfə almaqda ciddi rol oynaya biləcəyini hesab edir. Əgər Tehran bu raketi döyüşdə işə salsa, münaqişə daha sərt mərhələyə keçə bilər.
Qeyd edək ki, İran indiyədək əsasən köhnə texnologiyalı raketlərdən istifadə edib. Mütəxəssislər bununla Tehranın həm resurslarını qoruduğunu, həm də münaqişəni daha genişmiqyaslı savaş səviyyəsinə çıxarmamaq niyyətində olduğunu bildirirlər. Lakin İranın ali lideri Əli Xamneyinin “İsrail ən ağır bədəli ödəyəcək” bəyanatı daha sərt cavab ehtimalını artırır.
