AzerVoice, Analitik Təhlil Mərkəzinin eksperti , ƏHMƏD SALİH HƏLƏBİ (MƏKKƏ)
Səudiyyə Ərəbistanı bu il Həcc mövsümündə zəvvarların rahatlığını təmin etmək üçün genişmiqyaslı yeni layihələri reallaşdırır. Məkkə və Mədinə arasında hərəkət edən zəvvarlar üçün nəqliyyat, infrastruktur və texnoloji sahələrdə nəzərəçarpacaq yeniliklər tətbiq olunub.
Zəvvarların müqəddəs məkanlar — Ərəfat, Müzdəlifə və Minə arasında rahat hərəkətini təmin etmək məqsədilə 25 mindən çox avtobus xidmətdədir. Bununla yanaşı, "Qətar əl-Məşəir" adlanan xüsusi Həcc qatarı 2500-dən çox səfər həyata keçirərək nəqliyyatı asanlaşdırır.
Hərameyn sürətli qatarı
Məkkə və Mədinəni cəmi 120 dəqiqəyə birləşdirən 450 km-lik "Hərameyn Sürətli Qatarı" layihəsi 63 milyard SAR ( Səudiyə Riyalı) məbləğində vəsaitlə reallaşdırılıb. Bu xətt illik 60 milyon sərnişin daşımaq imkanına malikdir və saatda 300 km-ə qədər sürətlə hərəkət edir. O, Yaxın Şərq və Şimali Afrikanın ən sürətli sərnişin qatarıdır.
Ərəfatda Yaşıl Sahələr və Soyutma Sistemləri
“Cəbəl ər-Rəhmə” bölgəsində həyata keçirilən ikinci mərhələli yenidənqurma layihəsi çərçivəsində ağaclı, kölgəlikli istirahət sahələri yaradılıb, rütubətləndirici dirəklər və su mənbələri yerləşdirilib. Eyni zamanda “Nəmirə Məscidi” ətrafında 2000-dən çox ağac əkilib, 320 kölgəlik və 350 ventilyator quraşdırılıb. Cəmərat bölgəsində isə 200 rütubət ventilatoru əlavə olunub.
Zəvvarlar üçün yeni tualet kompleksləri
Minə bölgəsində zəvvarların rahatlığını təmin etmək üçün 2116 köhnə tualet 61 müasir iki mərtəbəli sanitar qovşaqlarla əvəzlənib. Bu komplekslərdə 5600-dən çox sanitar otaq var. Əlavə olaraq, bölgədə 2400 içməli su məntəqəsi quraşdırılıb.
Yeni nəsil eskalatorlar və sosial xidmətlər
Yüksək ərazilərdə yerləşən çadır düşərgələrinə çıxışı asanlaşdırmaq məqsədilə 32 müasir elektrik pilləkəni quraşdırılıb. Yaşlılar və əlillər üçün bu layihə xüsusi əhəmiyyət daşıyır. “İsraə əl-Məşəir” layihəsi çərçivəsində 20 min zəvvarın yerləşə biləcəyi müasir çadır modulları yaradılıb. Bu bölmələrdə yeməkxanalar, paltar yuyan yerlər və bərbərxanalar da var.
Ağıllı texnologiyalar və enerji istehsalı
Texnoloji yeniliklər arasında "Enerji Marşrutu" layihəsi xüsusi diqqət çəkir. Bu sistem zəvvarların hərəkətindən enerji toplayaraq ənənəvi enerji mənbələrindən asılılığı azaltmağı hədəfləyir. Süni intellekt bu il həm zəvvarların düşərgələrə giriş sayını hesablamaqda, həm də mətbəx tullantılarını izləmək və zəvvar məmnuniyyətini üz ifadələri və bədən hərəkətləri ilə təhlil etmək üçün istifadə olunacaq.
Bu layihələr, Səudiyyə rəhbərliyinin Həcc ziyarətini daha təhlükəsiz, rahat və müasir hala gətirməyə yönəlmiş səylərinin bir göstəricisi kimi qiymətləndirilir.
