BAKI,AzerVoice

Quranın 98-ci surəsi olan Bəyyinə surəsi səkkiz ayədən ibarətdir. Məkkə dövründə nazil olduğunu bildirən rəvayətlərlə yanaşı, bəzi rəvayətlərə və üslubuna əsasən Mədinə dövründə nazil olduğunu da iddia etmək mümkündür. Surənin adı bir və üçüncü ayələrdəki “bəyyinə” (açıq-aydın dəlil) sözündən götürülmüşdür. Surənin əsas mövzusu əhlikitabın açıq dəlil kimi Qurana inanmaması, inkar etməsidir. Bununla yanaşı, dini inkar edən insanlarla inananların fərqi və əməllərinin qarşılığı haqqında məlumat verilir.
Surənin ilk beş ayəsində, istər Əhli-kitabdan olan inkarçılar, istərsə də müşriklərin Peyğəmbərin zühuruna qədər öz mövqelərini davam etdirdikləri xatırladılır.
Tövrat və İncildə gələcəyi müjdələnən peyğəmbərin hələ göndərilməmiş olmasını onlar öz davranışlarına bəhanə kimi göstərirdilər.
Ancaq Peyğəmbər gəldikdən sonra, xüsusilə Əhli-kitabın bütövlükdə haqq dini qəbul etməsi lazım olduğu halda bunun belə olmadığı vurğulanır; onların bir qisminin İslama yönəldiyi, digərlərinin isə inkar üzərində qaldığına diqqət çəkilir. Onlardan gözlənilən isə səmimiyyətlə yalnız Allaha ibadət etmələri, namazı düzgün qılıb zəkat vermələri idi. Beləliklə, haqq dinin və həqiqi dindarlığın əsas prinsipləri ortaya qoyulur.

Son üç ayə möminlə kafirin fərqini göstərir.