BAKI,AzerVoice

Rəcəb Tayyib Ərdoğan Türkiyənin enerji sektorundakı nailiyyətlərini açıqlayaraq, Türkiyənin Şırnak vilayətinin şimal-şərqində yerləşən Qabar dağında gündəlik neft istehsalının 81 min bareli keçdiyini bildirib.

AzerVoice xəbər verir ki, Türkiyənin ümumi neft istehsalı isə 135 min bareli aşaraq tarixi zirvəyə çatıb.

“Müxalifətin hər seçkidə ‘neft tapdılar’ deyə lağ etdiyi Qabarda gündəlik istehsal 81 min bareli keçib. 3 mindən çox personal sahəni genişləndirmək üçün çalışır” – deyə o qeyd edib.

Türkiyə lideri həmçinin qeyd edib ki, xaricdəki neft yataqlarında isə 40 min barellik istehsal davam edir.

Ərdoğan 2026-cı ildə Sakarya qaz yatağında Faz 1 və Faz 2-də ümumilikdə 20 milyon kubmetr, 2028-ci ildə isə 40 milyon kubmetr istehsal hədəflədiklərini bildirib.

“Bu hədəfə çatdıqda məişət qaz ehtiyacını tamamilə öz mənbələrimizlə qarşılayacağıq” – deyə o əlavə edib.

Ərdoğan Türkiyənin Pakistan, İndoneziya və Malayziya ilə enerji sahəsində əlaqələri gücləndirdiyini, İngiltərə və Fransa mərkəzli iki böyük neft şirkəti ilə mayeləşdirilmiş təbii qaz tədarükü üçün müqavilələr bağlandığını açıqlayıb.

Türkmənistan təbii qazının İran üzərindən 1 martdan etibarən Türkiyəyə axışına başlanılıb və il sonuna qədər 1,3 milyard kubmetr qaz təmin ediləcək. Bu müqavilənin 5 il uzadılması hədəflənir. Avropa ölkələrinin enerji böhranını yüngülləşdirmək üçün də addımlar atılıb.