BAKI, AzerVoice

Türkiyənin müdafiə və aviasiya sənayesi 2025-ci ilin aprelində rekord ixrac göstəricisinə imza atıb.

AzerVoice xəbər verir ki, Türkiyənin müdafiə və aviasiya sənayesi 2025-ci ilin aprel ayında 54 faiz artım göstərərək 539 milyon dollarlıq ixracla yeni bir zirvəyə çatıb.

Müdafiə Sənayesi Başqanı Haluk Görgün sosial media hesabında paylaşdığı açıqlamada aprel ayı üzrə sektorun rekord göstəricilər əldə etdiyini bildirib. Görgün qeyd edib ki, yanvar-aprel dövründə ümumi ixrac 67 faiz artaraq 2 milyard 238 milyon dollara yüksəlib. Son 12 ayın göstəricilərinə əsasən isə bu sahədəki artım 763 milyon dollar həddini keçib.

“Müdafiə və aviasiya sənayesi ixracatında yeni zirvə müşahidə edildi,” – deyən Görgün, bu nailiyyətin sadəcə müvəqqəti uğur olmadığını, əksinə, davamlı və strateji şəkildə yüksələn inkişafın göstəricisi olduğunu vurğulayıb.

Sektorun uğurunda əməyi olan sənayeçilərə, işçilərə və bütün tərəfdaşlara təşəkkür edən Görgün , “Milli texnologiyalarla böyüyən bir Türkiyə üçün dayanmadan çalışacağıq. Yüksək texnologiyalı və yüksək əlavə dəyərli məhsullarla ixracı davamlı şəkildə artırmağı hədəfləyirik. İri şirkətlərdən KOBİ-lərə qədər olan uğur zəncirini daha da möhkəmləndirəcəyik” - deyə bildirib.

Qeyd edək ki, Türkiyə son illərdə müdafiə sənayesinə yatırımlarını artıraraq yerli və milli texnologiyalar əsasında beynəlxalq bazarda daha geniş yer almağa çalışır. Bu istiqamətdə atılan addımlar ixrac göstəricilərinə də əhəmiyyətli dərəcədə təsir göstərir.