BAKI, AzerVoice
Yunanıstanın Zakintos adası Avropanın ən çox turist qəbul edən bölgəsi olaraq yeni bir rekorda imza atıb.
Travel tərəfindən yayımlanan son hesabatda bildirilir ki, ada sakinlərinin hər birinə 150 turist düşür, bu da onu qitənin ən sıx turistik məkanına çevirir.
Araşdırma Avropa Komissiyasının məlumatları əsasında hazırlanıb və üç əsas göstərici – ümumi gecələmə sayı, kvadrat kilometrə düşən turist sıxlığı və yerli sakinə düşən turist sayı – üzərində qurulub. Bu göstəricilər kiçik və çox tanınmayan yerlərin kütləvi turizmin əsl yükünü daşıdığını üzə çıxarıb.
Zakintosun əsas şəhərində yaşayan sakinlərdən biri Yunan mətbuatına bildirib ki, kirayələr bahalaşıb, yay aylarında yollar iflic olur və infrastruktur bu yüklənməyə cavab vermir.
Hesabatda qeyd olunur ki, turizmin artması daşınmaz əmlak qiymətlərini, ətraf mühitə təsirləri və ictimai xidmətlər üzərindəki təzyiqləri artırır.
Yerli sakinə düşən turist sayına görə ikinci sırada Xorvatiyanın İstria bölgəsi gəlir. Burada 1.000 nəfərə 133.467 turist düşür. Üçüncü sırada isə Kanarya Adalarındakı Fuerteventura yerləşir – burada bu nisbət 120:1 təşkil edir.
Bütün etirazlara baxmayaraq, Kanarya Adaları 2025-ci ilin mart ayında 1,55 milyon xarici turist qəbul edərək yeni bir rekorda imza atıb. Bu rəqəm ötən ilin eyni dövrü ilə müqayisədə 0,9% artım deməkdir.
Hesabat yalnız yüklənmiş turizm bölgələrini deyil, kütləvi turizmdən uzaq qalan məkanları da açıqlayıb. Ən az turist düşən bölgələr arasında Bolqarıstandakı Targovişte (1 yerli əhaliyə 332 turist), Polşadakı Rıbnik (351:1) və İtaliyanın Benevento şəhəri (398:1) yer alır.
Kvadrat kilometrə görə ən az turistin düşdüyü bölgə isə Norveçin Arktika dairəsində yerləşən Yan Mayen adasıdır, burada rəsmi olaraq turist sıxlığı sıfırdır. Onu Rumıniyanın Teleorman bölgəsi (1,21) və Norveçin Svalbard adası (2,4) izləyir.
