BAKI, AzerVoice

HƏMAS, Qətər tərəfindən yanvar ayında təklif olunmuş İsrailin Qəzza zolağından çıxarılması planına qayıtmağa və bəzi kiçik güzəştlərə getməyə hazırdır.

AzerVoice xəbər verir ki, bu barədə "Al Arabiya" telekanalı Fələstin mənbələrinə istinadən məlumat yayıb.

Məlumata görə, Dohada keçirilən məsləhətləşmələr zamanı HƏMAS nümayəndələri Qətərin təqdim etdiyi, İsrail ordusunun Qəzza zolağından çıxmasını nəzərdə tutan sənədin müzakirəsinə yenidən qayıtmağa razılıq veriblər. Bu sənədə əsasən, İsrail hərbi qüvvələri Fələstin ərazisinin sərhədindən təxminən 700 metr geri çəkilməli, bəzi bölgələrdə isə bu məsafə 400 metr olmalıdır.

Mənbələrin bildirdiyinə görə, HƏMAS bu planın bəzi bəndlərinin düzəldilməsində çeviklik göstərməyə hazırdır. Lakin HƏMAS "Moraq oxu" adlanan və Rəfah ilə Xan-Yunis şəhərləri arasında Qəzza zolağını şərqdən qərbə keçən bölgədə İsrail qoşunlarının qalmasına tamamilə qarşı çıxır. HƏMAS rəhbərliyi hesab edir ki, bu ərazidə İsrail hərbçilərinin qalması təxminən 400 min fələstinlinin Rəfaha qayıtmasına mane olacaq.

Qeyd edək ki, iyulun 6-da HƏMAS və İsrail, Misir, Qətər və ABŞ-ın vasitəçiliyi ilə Dohada atəşkəsin əldə olunması və Qəzzada saxlanılan israilli girovların azad edilməsi üzrə danışıqlara yenidən başlayıb. İyulun 8-də Qətər Baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari bildirib ki, danışıqlar hələ başlamayıb və vasitəçilər HƏMAS və İsrail nümayəndələri ilə fikir ayrılıqlarını aradan qaldırmaq və gələcək müzakirələrin çərçivəsini müəyyən etmək məqsədilə ilkin məsləhətləşmələr aparırlar. Onun sözlərinə görə, Qəzzada atəşkəslə bağlı razılıq əldə etmək vaxt tələb edəcək.