BAKI,
AzerVoice
Antarktidada mikroplastik izləri tapıldı – Təmiz bölgələr belə
təhlükədədir.
AzerVoice xəbər verir ki, Britaniyalı
qütb tədqiqatçısı Alan Chambers-in Antarktidada topladığı qar
nümunələrində mikroplastik izləri aşkarlanıb.
Kolumbiya Universiteti ilə əməkdaşlıq çərçivəsində aparılan
araşdırma insan təsirindən uzaq ərazilərdə belə plastik
çirklənmənin yayılma miqyasını ortaya qoyur.
Keçmiş Kral Dəniz Piyadası olan Chambers, 1150 kilometr məsafəni mənfi 35 dərəcəyə çatan çətin hava şəraitində qət edərək qar və buz nümunələri toplayıb. Onun rəhbərlik etdiyi “Mission Spiritus” adlı elmi ekspedisiya çərçivəsində toplanan nümunələrin təhlili nəticəsində Antarktidanın mərkəzindən götürülən qar qatında plastik və qara karbon hissəcikləri tapılıb.
Mikroplastiklərin 5 millimetrdən, nanoplastiklərin isə 1 mikrometrdən kiçik olduğu bildirilir. Bu maddələr görünməz olsa da, ekosistem və canlı orqanizmlər üçün ciddi təhlükə yaradır. Kolumbiya Universitetindən Prof. Maureen Raymo bu cür uzaq bölgələrdən nümunə əldə etməyin elmi baxımdan nadir fürsət olduğunu qeyd edib.
Alan Chambers artıq dünyanın digər nöqtələrindən də – Ərəbistan yarımadasındakı Rubul Xali səhrasından, Farer adalarından və növbəti dayanacağı olan Çilidəki Atakama səhrasından nümunələr toplamağa başlayıb. Layihənin məqsədi plastik çirklənmənin miqyasını göstərməklə yanaşı, ictimai məlumatlılığı artırmaq və təkrar emal texnologiyalarının inkişafına töhfə verməkdir.
Qeyd edək ki, son elmi araşdırmalar insan beynindəki mikroplastik miqdarının son on ildə 50 faiz artdığını göstərir. Bu, qlobal çirklənmənin görünməyən, lakin təhlükəli miqyasını ortaya qoyur.
