BAKI, AzerVoice

“Azadlıq Donanması” koalisiyasının yeni bir gəmisi bu gün Siciliyanın Sirakuz limanından Qəzza zolağına doğru yola düşüb.

AzerVoice-un məlumatına görə, gəmidə fələstinliləri dəstəkləyən təxminən 15 fəal və humanitar yardım yükləri var.

“Azadlıq Donanması”nın “Hənzələ” adlı gəmisi yerli vaxtla saat 12:00 radələrində Sirakuz limanından yola çıxıb. Gəmi Qəzzaya, artıq 20 aydan çoxdur davam edən müharibənin yaratdığı humanitar fəlakətin yaşandığı əraziyə çatmağa çalışacaq.

Gəminin yola salınması zamanı limanda onlarla insan toplaşıb. Onlardan bəziləri əllərində Fələstin bayrağı daşıyaraq “Azad Fələstin” şüarları səsləndiriblər. “Azadlıq Donanması” hərəkatının Fransadakı koordinatoru Klod Lyostekin sözlərinə görə, səfər Qəzza xalqı ilə beynəlxalq və humanitar həmrəyliyi ifadə etmək məqsədi daşıyır.

Norveç istehsalı olan gəmi tibbi ləvazimatlar, qida məhsulları, uşaq ehtiyacları və dərmanlar daşıyır və təxminən 1 800 kilometrlik məsafəni bir həftəyə qət etməsi nəzərdə tutulur.

Gəmi İtaliyanın cənub-şərqində yerləşən Qallipoli limanında dayanacaq və orada “Boyun əyməyən Fransa” (LFI) partiyasından deputatlar Qabriyel Katala və Emma Foro iyulun 18-də donanmaya qoşulacaqlar.