BAKI, AzerVoice
Alimlər insan gözünün nadir hallarda qavradığı yeni, intensiv mavi-yaşıl rəng kəşf ediblər.
AzerVoice xəbər verir ki, Kaliforniya
Universitetinin tədqiqatçıları “olo” adlandırdıqları bu yeni rəngi
“Science Advances” jurnalında dərc olunan araşdırmada təqdim
ediblər.
Onların fikrincə, bu rəng yalnız xüsusi cihaz vasitəsilə görünə
bilər və indiyə qədər onu cəmi beş nəfər müşahidə edib. Cihaz,
gözün yalnız bir növ konus hüceyrəsini stimullaşdıraraq, adi
hallarda mümkün olmayan dərəcədə doymuş rəngləri görməyə imkan
verir. Tədqiqatçı Ren Nq bu təcrübədə iştirak edənlərdən biri olub
və "Bunu təsvir etmək çətindir, çox parlaqdır" sözləri ilə rəngi
ifadə edib.
Qeyd edək ki, rənglər gözün tor qişasındakı konus hüceyrələrinin işığın müxtəlif dalğa uzunluqlarına verdiyi reaksiya nəticəsində qavranılır. Adətən bir neçə konus növü eyni vaxtda stimullaşır, bu isə rəng qavrayışının məhdudlaşmasına səbəb olur. Yeni cihaz bu maneəni aşaraq daha unikal rənglərin görünməsini təmin edir.