On iki ölkə, o cümlədən ABŞ və Sovet İttifaqı, Antarktida müqaviləsini imzalayaraq qitədə hərbi fəaliyyətləri və silah sınaqlarını qadağan etdilər. Bu sənəd Soyuq müharibə dövründə imzalanan ilk silahlara nəzarət sazişi hesab olunur.
1800-cü illərdən etibarən Böyük Britaniya, Avstraliya, Çili və Norveç də daxil olmaqla bir sıra ölkələr Antarktidanın müxtəlif hissələrinə iddia irəli sürmüşdü. Bu rəqabətli iddialar diplomatik gərginliklərə, hətta silahlı toqquşmalara səbəb olmuşdu. 1948-ci ildə Argentina hərbi qüvvələri, hər iki ölkənin sahiblənmək istədiyi ərazidə britaniyalı hərbçilərə atəş açmışdı. Bu kimi hadisələr, eləcə də Sovet İttifaqının Antarktidaya marağının artmasına dair sübutlar ABŞ-ı qitənin BMT himayəsinə verilməsi ideyasını irəli sürməyə vadar etdi. Lakin bu fikir rədd edildi, çünki həmin ərazidə marağı olan dövlətlərin heç biri suverenlik iddialarından imtina edib səlahiyyəti beynəlxalq təşkilata verməyə razı olmadı.
1950-ci illərdə ABŞ-da bəzi rəsmilər Antarktida ilə bağlı daha fəal siyasət yürütməyin vaxtı çatdığını irəli sürməyə başladılar. Onlar hesab edirdilər ki, qitə nüvə sınaqları üçün perspektivli hərbi məkan ola bilər. Lakin prezident Duayt Eyzenhauer fərqli yanaşma seçdi. ABŞ diplomatları sovet həmkarları ilə birlikdə Antarktidanı hərbidən azad zona elan edən və ərazi iddialarının həllini gələcək müzakirələrə saxlayan bir müqavilə hazırladılar.
Sənədə görə qitədə hər hansı hərbi iştirak, eləcə də nüvə silahları daxil olmaqla istənilən silah sınaqları qadağan olunurdu. Elmi tədqiqatlara icazə verilir, alimlərin isə müxtəlif ölkələrin iddia etdiyi bölgələrdən sərbəst şəkildə keçməsinə maneə qoyulmurdu. Sənədi on iki dövlət imzaladı. Müqavilə Antarktidada suverenlik məsələlərinə birbaşa toxunmadığı üçün qitəyə ərazi iddiası olan bütün ölkələr bunu qəbul etdilər. Bu baxımdan, müqavilə ABŞ–SSRİ arasında silahlara nəzarət və siyasi əməkdaşlıq sahəsində kiçik, lakin mühüm ilk addım sayılır.
Müqavilə 1961-ci ilin iyununda qüvvəyə mindi və bu günə qədər Antarktida ilə bağlı tətbiq olunan əsas siyasətlərin əsasını qoydu.