BAKI,AzerVoice

HƏMAS, İsrailin Qəzzə zolağındakı fələstinli mülki şəxslərə qarşı hücumlarını artırmasını kəskin şəkildə qınayıb və beynəlxalq ictimaiyyəti İsrail ordusunun törətdiyi cinayətləri dayandırmaq üçün hərəkətə keçməyə çağırıb.

AzerVoice xəbər verir ki, bu barədə HƏMAS bəyanat yayıb.

“Müharibə cinayətkarı Netanyahunun hökuməti Qəzza zolağındakı mülki şəxslərə qarşı vəhşi müharibəsini davam etdirir. Ramazan bayramının ikinci günündə yaşayış məntəqələrinə və qaçqın çadırlarına qarşı amansız bombardmanlarını daha da artırıb”,- deyə bildirilib.

Açıqlamada, bu hücumların beynəlxalq ictimaiyyətin gözü qarşısında “İsrailin soyqırım və məcburi köç siyasəti” çərçivəsində həyata keçirildiyi və məqsədin müdafiəsiz mülki şəxsləri və onların sığındığı düşərgələri hədəf almaq olduğu vurğulanıb.

Bəyanatda, beynəlxalq ictimaiyyət, ərəb və islam dünyasının dövlətləri və xalqları “İsrailin törətdiyi cinayətləri və beynəlxalq humanitar hüququn açıq-aşkar pozuntularını dayandırmaq” üçün təcili tədbirlər görməyə çağırılıb.

İsrail ordusu, 19 yanvarda qüvvəyə minmiş atəşkəsin ardınca 18 mart səhəri Qəzzada şiddətli hücumlara yenidən başlayıb.

İsrailin hücumları bərpa etməsindən sonra əsasən qadınlar, uşaqlar və yaşlılar olmaqla 1000-dən çox fələstinli həyatını itirib, 2360-dan çox insan yaralanıb.