BAKI, AzerVoice, Orxan Qədirzadə

Türkiyə bölgədə baş verən prosesləri diqqətlə izləyir, mümkün dəstək variantları dəyərləndirilir.

AzerVoice xəbər verir ki, bu barədə Türkiyə Prezidenti Rəcəb Tayyib Ərdoğan Sudandakı hazırkı vəziyyəti şərh edərkən deyib.

Ekspertlərə görə, Türkiyə ilkin mərhələdə neytral diplomatiya yürüdüb, humanitar kanalları açıq saxlayıb və səfirliyin fəaliyyətini Port Sudanda davam etdirib. Həmçinin son dövrdə Ankaranın siyasi mövqeyinin Sudan ordusuna daha yaxın olduğu qeyd olunur.

Ekspertlərin fikrincə, Sudan ordusu ölkənin legitim dövlət strukturu kimi qəbul olunur, “Sürətli Dəstək Qüvvələri”nin (RSF) isə həm daxildə, həm də beynəlxalq aləmdə legitimlik problemi mövcuddur.

Beynəlxalq mətbuatda Türkiyənin Sudan ordusuna insansız hava vasitələri və silah dəstəyi göstərdiyi barədə məlumatlar yayılsa da, bu iddialar rəsmi olaraq təsdiqlənməyib. Bununla belə, ekspertlər Ankara ilə ordunun əməkdaşlığının son zamanlar daha aydın müşahidə edildiyini bildirirlər.

Məlumatlara görə, Misir də tarixi əlaqələr və təhlükəsizlik səbəblərinə görə Sudan ordusunun tərəfini tutur. Ekspertlər hesab edirlər ki, Sudandakı qeyri-sabitlik region ölkələri üçün, xüsusilə Qahirə üçün birbaşa təhlükə yarada bilər.

Ekspertlərin fikrincə münaqişənin əsas səbəblərindən biri yeraltı təbii sərvətlər və regional geosiyasi rəqabətdir. Xüsusilə Birləşmiş Ərəb Əmirliklərinin münaqişəyə maliyyə, logistika və silah dəstəyi ilə müdaxilə etdiyi bildirilir. Sudan qızılının böyük hissəsinin BƏƏ-yə daşındığı və silah–qızıl xəttində Əmirliklərin mühüm rol oynadığı vurğulanır.