BAKI, AzerVoice, Orxan Qədirzadə

Əlcəzairli boksçu İman Xəlif beynəlxalq arenada ona qarşı verilən qərarların idman karyerasını dayandırmayacağını bildirərək, mübarizəni həm rinqdə, həm də hüquqi meydanda davam etdirdiyini açıqlayıb. O, Los-Anceles 2028 Yay Olimpiya Oyunlarında yeni medal qazanmaqda qərarlı olduğunu deyib.

Xəlif Beynəlxalq Boks Federasiyasının tətbiq etdiyi yeni cinsiyyət testi qaydasının məhz ona qarşı hazırlandığını iddia edib.

“Bu qanun ümumi idmançılar üçün yox, sırf İman Xəlif üçün yazılıb. Paris Olimpiadasından sonra bu qərarı çıxardılar. Mən öz haqqımı qanunla müdafiə edəcəyəm, təzyiqlə yox.”-deyə o bildirib.

Əlcəzairli idmançı Olimpiya hədəfini davam etdirdiyini vurğulayıb: “Bəli, Allahın izni ilə, yeni Olimpiya medalı qazanmaq istəyirəm. Hələ açıqlamadığım sürprizlərim var. Doğru yoldayıq.”

Xəlif, son iki il ərzində özünə qarşı güclü kampaniyaların aparıldığını və müxtəlif beynəlxalq qurumların yeni qərarlarla onu hədəfə aldığını deyib.

“Paris Olimpiadasında və ondan sonra indiyə qədər hücumlara və haqsızlıqlara məruz qalmışam. Hazırda İdman Arbitraj Məhkəməsində işim var. İnşallah, nəticə xeyirli olacaq.Xəyallarım davam edir, iş davam edir. Mənə qarşı kampaniya aparanlara deyirəm: davam edin, çünki mən inkişaf edirəm.”-deyə o qeyd edib.