BAKI, AzerVoice
Birləşmiş Ərəb Əmirlikləri (BƏƏ), İranın Qətərdə yerləşən Əl-Udeyd aviabazasına endirdiyi zərbələrdən sonra öz hava məkanını bağlayıb.
AzerVoice-un məlumatına görə, bu barədə Beynəlxalq uçuşları izləmə xidməti "Flightradar"ın X sosial şəbəkəsində etdiyi paylaşımda bildirilib.
“Uçuş marşrutları və aviadispetçer xidmətləri ilə aparılan radio danışıqların audioyazılarına əsasən, hazırda BƏƏ-nin hava məkanı bağlıdır” - deyə, paylaşımda qeyd olunub.
Eyni zamanda, Bəhreynin Mülki Aviasiya İdarəsi ölkənin hava məkanının müvəqqəti olaraq bağlanması barədə göstəriş verib.
Küveyt də həmçinin, hava məkanını bağladığını elan edib.
“Ölkənin hava məkanı ehtiyat tədbiri olaraq müvəqqəti bağlanır. Bu qərar bugündən qüvvəyə minir və növbəti bildirişə qədər qüvvədə qalacaq. Bu addım son regional hadisələr fonunda maksimum təhlükəsizliyi təmin etmək məqsədilə atılmışdır” - deyə, Küveyt Mülki Aviasiya İdarəsinin açıqlamasında qeyd olunub.
