BAKI, AzerVoice, Orxan Qədirzadə

İsrailin baş naziri Benyamin Netanyahu bazar günü bildirib ki, “İsrail suveren dövlət olaraq öz təhlükəsizlik siyasətini və Qəzza zolağında əməkdaşlıq etməyə razı olduğu beynəlxalq qüvvələri özü müəyyən edəcək”.

“Biz təhlükəsizliyimizə özümüz nəzarət edirik və beynəlxalq güclərə aydın şəkildə izah etmişik ki, İsrail hansı qüvvələrin bizim üçün qəbuledilməz olduğunu özü müəyyən edəcək. Biz bu şəkildə hərəkət etmişik və bu istiqamətdə hərəkət etməyə davam edəcəyik”.-deyə o bildirib.

O əlavə edib ki, “bu mövqe, son bir neçə gün ərzində yüksək səviyyəli ABŞ rəsmilərinin də ifadə etdiyi kimi, ABŞ tərəfindən də qəbul edilir”.

ABŞ vasitəçiliyi ilə “HƏMAS” və İsrail arasında əldə olunan atəşkəs razılaşmasına əsasən, yaxın günlərdə əsasən ərəb və müsəlman ölkələrinin hərbçilərindən ibarət beynəlxalq qüvvələrin dağıdılmış Qəzza zolağına yerləşdirilməsi planlaşdırılır.

ABŞ-ın dövlət katibi Marko Rubio cümə günü bildirib ki, İsrail Qəzzədə yerləşdirilməsi nəzərdə tutulan beynəlxalq qüvvədə iştirak edəcək ölkələrdən “rahat” olmalıdır.
“Bir neçə ölkə iştirak təklifi irəli sürüb (...) İsrail bu şəxslər və ya ölkələrlə özünü rahat hiss etməlidir”.-deyə Rubio İsrailin cənubundakı Kiriyat Gat şəhərində yerləşən “Hərbi-Sivil Əlaqələndirmə Mərkəzi”ndə çıxış edərək deyib.

ABŞ prezidenti Donald Trampın Qəzzədə atəşkəsin təmin olunması üçün irəli sürdüyü planın növbəti mərhələlərinə “Həmas”ın silahsızlaşdırılması, beynəlxalq təhlükəsizlik qüvvəsinin yerləşdirilməsi və dağıdılmış bölgənin bərpası daxildir