BAKI, AzerVoice, Nailə Babazadə
ABŞ-ın BMT-dəki daimi nümayəndəliyi bəyan edib ki, Səudiyyə Ərəbistanı, Qətər və Birləşmiş Ərəb Əmirlikləri (BƏƏ) Vaşinqtonun Qəzza zolağı ilə bağlı təqdim etdiyi yeni qətnamə layihəsini dəstəkləyiblər.
AzerVoice xəbər verir ki, məlumata görə, sənəd ikiillik keçid dövrü çərçivəsində Qəzzada beynəlxalq sabitləşdirmə qüvvəsinin yerləşdirilməsini və yeni idarəetmə orqanının — “Sülh Şurası”nın yaradılmasını nəzərdə tutur. Bu struktur vasitəsilə Qəzzaya nəzarətin HƏMAS-dan alınması və ərazinin tərksilah edilməsi planlaşdırılır.
ABŞ-ın BMT-dəki səfiri Mayk Voltsun rəhbərliyi ilə keçirilən görüşdə Təhlükəsizlik Şurasının 10 seçilmiş üzvü (Əlcəzair, Danimarka, Yunanıstan, Qayana, Pakistan, Panama, Cənubi Koreya, Syerra-Leone, Sloveniya və Somali), həmçinin Səudiyyə Ərəbistanı, Misir, Qətər, Türkiyə və BƏƏ kimi regional dövlətlər layihəyə dəstək ifadə ediblər.
Qətnamə layihəsinə əsasən, Qəzzada yerləşdiriləcək “Beynəlxalq Sabitləşdirmə Qüvvəsi” mülki əhalinin qorunması, humanitar yardım axınlarının təmin edilməsi, sərhədlərdə təhlükəsizlik zonalarının yaradılması, qeyri-dövlət silahlı qruplarının tərksilahı və yeni fələstinli polis qüvvəsinin hazırlanması ilə məşğul olacaq.
ABŞ-ın BMT-dəki nümayəndəliyi bildirib ki, Qəzzaya amerikalı hərbçilər göndərilməyəcək. Bunun əvəzində Vaşinqton İndoneziya, BƏƏ, Misir, Qətər, Türkiyə və Azərbaycan kimi ölkələrlə beynəlxalq qüvvəyə qoşulmaq məsələsini müzakirə edir.
ABŞ missiyasının sözçüsü qeyd edib ki, bu təşəbbüs Yaxın Şərqdə onilliklərdir davam edən qarşıdurmalara son qoymaq və Qəzzanı daha təhlükəsiz, sabit və firavan bölgəyə çevirmək üçün “tarixi fürsət” yaradır.
Qətnamə layihəsinin mətni çərşənbə gecəsi BMT Təhlükəsizlik Şurasının 15 üzvünə rəsmi baxış üçün təqdim olunub.