BAKI, AzerVoice
Azərbaycan Ordusunun Xüsusi Təyinatlı Qüvvələri ilə Birləşmiş Ərəb Əmirliklərinin Prezident Qvardiyasının Xüsusi Əməliyyat Komandanlığı bölmələrinin iştirakı ilə keçirilən “Sarsılmaz Tərəfdaşlıq-2025” birgə xüsusi təyinatlı qüvvələr təlimi oktyabrın 30-da başa çatıb.
Müdafiə Nazirliyinin məlumatına görə, bağlanış mərasimində əvvəlcə hər iki ölkənin şəhidlərinin xatirəsi bir dəqiqəlik sükutla yad edilib, Azərbaycan və BƏƏ-nin Dövlət himnləri səsləndirilib, bayraqlar ucaldılıb.
Çıxış edənlər Azərbaycan və BƏƏ xüsusi təyinatlıları arasında əməkdaşlığın dinamik şəkildə genişləndiyini vurğulayıb. Bildirilib ki, keçirilən təlimlər XTQ mənsublarının təcrübə mübadiləsi, real döyüş şəraitinə uyğun hazırlığın artırılması və qarşılıqlı əlaqələrin möhkəmləndirilməsi baxımından mühüm əhəmiyyət daşıyır.
Təlimdə fərqlənən hərbi qulluqçular mükafatlandırılıb, qarşılıqlı hədiyyələr təqdim olunub. Mərasimin sonunda xatirə fotosu çəkdirilib.
Bu birgə təlim Azərbaycan-BƏƏ hərbi əməkdaşlığının yeni mərhələyə keçdiyini göstərməklə yanaşı, regionda təhlükəsizliyə töhfə verən mühüm hərbi tərəfdaşlıq mesajı kimi qiymətləndirilir.
