BAKI,AzerVoice, İslam Ensiklopediyası
Qurani-Kərimin 2-ci və ən uzun surəsi olan Bəqərə surəsi 286 ayədən ibarətdir və Mədinə dövründə nazil olmuşdur. Surənin adı “inək” mənasını verir və bu ad, surənin 67-71-ci ayələrində yer alan, Həzrət Musa dövründə bir qətlin həllində Allahın inək kəsməyi əmr etdiyi hadisədən götürülmüşdür.
Bu surə islami hüququn təməl prinsipləri, iman və ibadət məsələləri, eləcə də tövhid və vəhyə itaət çağırışı ilə zəngindir. Eyni zamanda keçmiş ümmətlər, xüsusilə İsrailoğulları ilə bağlı ibrətamiz qissələrə geniş yer verilmişdir. Həzrət Adəm, İbrahim, Musa və Süleyman peyğəmbərlərlə bağlı hadisələr bu surədə əhatəli şəkildə təqdim olunur.
Ayətül-Kürsi və hüquqi hökmlər
Surənin ən məşhur və dərin məna daşıyan ayələrindən biri də “Ayətül-Kürsi” adlanan 255-ci ayədir. Bu ayə Allahın əzəməti, elmi və hakimiyyətini təsvir edir və İslam düşüncəsində böyük əhəmiyyət daşıyır.
Bəqərə surəsində qiblənin dəyişməsi (Məscidül-Əqsa istiqamətindən Kəbəyə), namaz, oruc, zəkat və həcc kimi ibadətlərə dair hökmlər, eləcə də cihad və iqtisadi münasibətlər, xüsusilə borclar və faizin qadağan olunması kimi hüquqi məsələlərə dair mühüm ayələr yer alır.
Bəqərə surəsi təkcə dini ritualları deyil, həm də sosial ədalət, insanlararası münasibətlər və əxlaqi prinsiplər haqqında əsaslı məlumatlar təqdim edir.
