BAKI, AzerVoice, Orxan Qədirzadə

Suriya Prezidenti Əhməd əş-Şaraa ölkədə yaşayan kürdlərin təhlükəsizliyinin terror təşkilatı PKK ilə əlaqə qurmaq yolu ilə təmin edilə bilməyəcəyini bəyan edib.

AzerVoice xəbər verir ki, Əhməd əş-Şara bu fikirləri Suriyanın dövlət televiziya kanalı olan “Əl-İxbariyə”yə verdiyi müsahibədə səsləndirib. Prezident bildirib ki, onilliklərdir Türkiyə ilə silahlı münaqişə yaşayan, xaricdən idarə olunan hərbi strukturun Suriyada təhlükəsizlik təminatçısı kimi təqdim edilməsi qəbuledilməzdir. Onun sözlərinə görə, Suriya öz ərazisində əlavə təhlükəsizlik problemi yaradacaq strukturlara yol verə bilməz.

Əhməd əş-Şaraa vurğulayıb ki, keçmiş prezident Bəşər Əsəd rejiminin siyasətindən bütün Suriya xalqı, o cümlədən kürdlər əziyyət çəkib və əvvəlki hakimiyyətin süqutu kürdlərə qarşı tətbiq olunan zülmə verilmiş ilk real cavab olub. Prezident kürdlərin cəsarətini yüksək qiymətləndirərək, gələcəkdə Suriya ordusunda kürdlərin geniş şəkildə təmsil olunmasını istədiyini qeyd edib.

Dövlət başçısı bildirib ki, kürd əhalinin təhlükəsizliyinin yeganə yolu onların dövlət institutlarına inteqrasiyasından keçir. O, təhlükəsizliyin Suriyadan kənarda yerləşən, region ölkələrinə hücumlar həyata keçirən, uşaqları silahlandıran və məcburi səfərbərlik aparan terror strukturları ilə əlaqə vasitəsilə təmin edilə bilməyəcəyini xüsusi vurğulayıb.

Bu arada PKK terror təşkilatının Hələb vilayətinin şərqində yerləşən Deyr-Hafir bölgəsində mülki əhalinin ərazini tərk etməsinə mane olduğu bildirilir. Suriya ordusu bölgəyə genişmiqyaslı qüvvə köçürüb və humanitar dəhlizin açıldığını elan etsə də, silahlı qruplaşmanın silah tətbiq etməklə mülki şəxslərin çıxışına mane olduğu qeyd olunur. Rəsmi mənbələr ordunun əsas məqsədinin mülki əhalinin təhlükəsiz şəkildə təxliyəsini təmin etmək olduğunu açıqlayıb.