BAKI,AzerVoice Analitik Təhlil Mərkəzi

İsrail hökumətinə Qəzza zolağındakı müharibəni dayandırması üçün beynəlxalq təzyiqlər artdığı bir vaxtda, dünya sabah – bazar ertəsi Ağ Evdə İsrailin baş naziri Benyamin Netanyahu ilə ABŞ prezidenti Donald Trampın görüşünün nəticələrini gözləyir.
BMT Baş Assambleyasında və onun kənarlarında keçirilən görüşlər və səslənən beynəlxalq mövqelər, görünür, ABŞ prezidentinin mövqeyini dəyişməyə müvəffəq olub. Tramp artıq İsrail baş nazirinə müharibəni bitirməsi üçün təzyiq göstərməyə başlayıb.
İsrail mənbələrinin məlumatına görə, Tramp müharibəyə son qoymaq qərarına gəlib və Netanyahunun razılığını almaq üçün çalışır. Bu planla HƏMAS hərəkatının artıq tanış olduğu bildirilir.
Netanyahu isə cümə gecəsi BMT-də çıxışından sonra qatıldığı bir tədbirdə Qəzza müharibəsinin “sonuna yaxınlaşdığını” bəyan edib. O deyib:
“Görüləsi işlər hələ qalır... biz sona yaxınlaşırıq: girovlarımızı vətənə qaytarmaq, düşmənlərimizi məğlub etmək, qonşularımızla sülh qurmaq və əlimizdə qılıncı saxlamaq... hazırda etdiyimiz budur.”
İsrailin “Kan” televiziya kanalı isə xəbər verib ki, ABŞ prezidentinin xüsusi nümayəndəsi Stiv Vitkof və kürəkəni Cared Kuşner Nyu-Yorkda Netanyahu ilə görüş zamanı ona belə deyiblər:“Prezident (Tramp) hesab edir ki, artıq müharibəni bitirmək vaxtıdır.”