BAKI, AzerVoice Analitik Təhlil Mərkəzi, Səməd Əyyubov

Qəzza əhalisi uzun müddətdir gigiyenik şəraitin olmaması səbəbindən müxtəlif dəri xəstəliklərindən əziyyət çəkirdi. İndi isə eyni infeksiyalar İsrail ordusunun əsgərlərinə də yayılıb.

Cümə günü ön cəbhəyə göndərilən yüzlərlə nizami və ehtiyat hərbçi qaşınmadan şikayətlənib, bədənlərində yaralar əmələ gəlib. “Yedioth Ahronoth” qəzetinin dərc etdiyi fotolarda əsgərlərin bədənində açıq yaralar görünür. Onların sözlərinə görə, səbəb bit, taxtabiti, digər həşərat sancmaları, üfunətli qoxu və dayanıqsız sularla bağlıdır.

Bir əsgərin atası deyib: “Oğlum əvvəlcə bu əziyyəti gizlətmişdi. Ailəlikcə istirahətə çıxanda təsadüfən bədənindəki yaraları gördük. Bu dəhşətli idi. Övladlarımız qaşınmadan yata bilmir. Bu, Qəzzanın başqa bir lənəti kimi geri dönür.”

Cəbhə məntəqələrində ağır vəziyyət

Ehtiyat zabitlərindən biri bildirib ki, bu problem Qəzzanın bir çox bölgəsində yayılıb. Onun sözlərinə görə, Cəbəliyə və Zeytun məhəllələrində xidmət zamanı eyni vəziyyətlə üzləşiblər. Burada zolağın yollarını nəzarətdə saxlamaq üçün müşahidə məntəqələri qurulub, əsgərlər üçün müvəqqəti baraklar tikilib. Hər birinə döşək verilsə də, taxtabitilər və digər həşəratlar döşəklərə yuva saldığı üçün əsgərlər yerdə yatmağa üstünlük verirlər.

Zabit əlavə edib ki, əvvəlcə bu məntəqələrdə bir neçə gün qalacaqlarını düşünüblər, lakin may ayından bəri aylarla orada xidmət edirlər. Danışıqların nəticəsiz qalması isə onların qalma müddətini daha da uzadıb. Onun sözlərinə görə, Filadelfiya oxu boyunca sabit kazarmalarda yerləşən əsgərlər belə problemlərlə üzləşmirlər və buna görə də digərləri onlara həsəd aparır. Cəbhə məntəqələrində isə nə həşəratlara qarşı dərmanlama aparılır, nə də hamam var. Əsgərlər yalnız nəm salfetlərlə bədənlərini silməklə kifayətlənirlər.

Ordu rəhbərliyi problemdən xəbərsizdir?

Ordu sözçüsü açıqlamasında komandanlığın bu problemdən xəbərsiz olduğunu bildirib. Lakin qəzet yüzlərlə əsgərin şikayətlərini aldığını iddia edir. Başqa bir zabit isə deyib ki, təkcə dərmanlama kifayət etmir, bütün Qəzza üzrə köklü həll tələb olunur. Çünki xəstəliklər milçəklər, heyvanlar və hətta hava vasitəsilə yayılır.

Bir əsgərin atası isə vəziyyəti belə təsvir edib: “Onsuz da mənasız bir müharibənin içindəyik. İndi də övladlarımız zibillikdə küçə itləri və pişiklərlə birgə yaşamağa məcbur edilirlər. Onlar hansısa xəstəliklə geri qayıdır və Allah bilir, sağalacaqlarmı. Bu artıq işğal deyil, xaotik hərbi əməliyyatlardır. Övladlarımızın sağlamlığını heç kim düşünmür. Biz etiraz edəndə isə cavab verirlər ki, guya büdcə axtarırlar ki, kimyəvi tualetlər və normal hamamlar qursunlar.”

Humanitar böhranın bumeranq təsiri

Qəzzada dəri xəstəliklərinin geniş yayılmasının əsas səbəbi İsrailin davamlı hücumları nəticəsində gigiyenik şərtlərin tamamilə məhv olmasıdır. İnsanlar susuz, kanalizasiyasız və tualetsiz açıq havada yaşamağa məcbur edilib. İndi isə bu böhranın bumeranq təsiri göstərərək İsrail əsgərlərinin özünü də vurduğu bildirilir.