BAKI,AzerVoice Analitik Təhlil Mərkəzi
Səudiyyə Ərəbistanının vəliəhdi və Baş naziri Məhəmməd bin Salman İsrailin bölgədəki təcavüzlərini qınayaraq, xüsusilə Qətərə qarşı həyata keçirilən son hücumu “ağlasığmaz” adlandırıb. O, Ər-Riyadın Qətərin bütün addımlarında yanında olduğunu və bunun üçün bütün imkanlarını səfərbər etdiyini bəyan edib.
Vəliəhd şahzadə Şura Məclisinin 9-cu çağırışının ikinci il sessiyasının açılışında çıxış edərək bildirib ki, İsrailin Qətərə hücumu ərəb, islam və beynəlxalq səviyyədə qəti tədbirlər tələb edir. O, həmçinin Qəzzada fələstinlilərə qarşı həyata keçirilən “aclıq siyasəti və məcburi köçürmələri” sərt şəkildə pisləyib.
“Qəzza torpaqları fələstinlilərə məxsusdur və bu haqqı heç bir təcavüz ala bilməz. Bizim mövqeyimiz dəyişməzdir – hüququ qorumaq və onun pozulmasının qarşısını almaq.”-deyə o bildirib.
Şahzadə vurğulayıb ki, 2002-ci ildə Səudiyyə tərəfindən irəli sürülən Ərəb Sülh Təşəbbüsü hələ də Fələstin dövlətinin qurulması üçün əsas yol xəritəsidir. Onun sözlərinə görə, Səudiyyənin diplomatik səyləri nəticəsində Fələstini tanıyan ölkələrin sayı artır və Nyu-Yorkda keçirilən beynəlxalq konfrans iki dövlətli həll yoluna dəstəyi gücləndirib.
Məhəmməd bin Salman Suriyada beynəlxalq sanksiyaların qaldırılmasına dəstək verdiklərini, ölkənin ərazi bütövlüyü və iqtisadi bərpası üçün təşəbbüslər həyata keçirdiklərini bildirib. O, həmçinin Livan, Yəmən və Sudanda sabitliyin təmin olunacağına ümidvar olduğunu vurğulayıb.
Şahzadə ölkə daxilində əldə edilən uğurlara toxunaraq bildirib ki, Səudiyyə iqtisadiyyatı artıq neftdən asılılığını azaldır:
“Qeyri-neft sektorlarının ÜDM-də payı 56%-ə çatıb.Ümumi daxili məhsul 4,5 trilyon rialı ötüb.660 beynəlxalq şirkət krallığı regional mərkəz seçib ki, bu da 2030 hədəflərini qabaqlayıb”-deyə o qeyd edib.
O, həmçinin süni intellekt sahəsində imzalanan razılaşmaların ölkəni qlobal mərkəzə çevirəcəyini, hərbi sənaye sektorunda isə lokallaşdırmanın 19%-ə çatdığını qeyd edib.
Məhəmməd bin Salman dövlətin güclü maliyyə bazası yaratmaqla sabit inkişafı təmin etdiyini və bunun nəticəsində işsizliyin minimuma endiyini, qadınların əmək bazarındakı iştirakının artdığını söyləyib. O, mənzil bazarında qiymət artımının qarşısını almaq üçün yeni siyasətlərin hazırlanacağını açıqlayıb.
Şahzadə həmçinin vurğulayıb ki, ictimai maraq ən ali məqsəddir və lazım gələrsə, hər hansı proqram və hədəflər milli maraqlara uyğun olaraq dəyişdiriləcək.
Məclis sədri Abdullah əl-Şeyx çıxışında vəliəhdi salamlayaraq, Şura Məclisinin “Səudiyyə 2030” vizyonu çərçivəsində qanunvericilik və nəzarət sahəsində fəal iştirak etdiyini, birinci ildə 462 qərar qəbul etdiyini qeyd edib.
