BAKI, AzerVoice, Orxan Qədirzadə
Rusiya Ukrayna ilə danışıqların İstanbul platformasında bərpasına açıq olduğunu və Türkiyənin bu prosesdəki rolunu yüksək qiymətləndirdiyini bildirib.
AzerVoice xəbər verir ki, Rusiya Xarici İşlər Nazirliyinin MDB ölkələri üzrə İkinci Departamentinin direktoru Aleksey Polişuk Moskvada verdiyi açıqlamada Rusiyanın Ukrayna ilə dialoqu davam etdirməyə hazır olduğunu deyib. Onun sözlərinə görə, Rusiya tərəfi Türkiyənin göstərdiyi qonaqpərvərliyi xüsusi dəyərləndirir və İstanbulun danışıqlar üçün uyğun platforma olduğunu hesab edir.
Polişuk xatırladıb ki, 2025-ci ildə Ukrayna Xarici İşlər Nazirliyi İstanbulda aparılan danışıqların dayandırıldığını elan edib və bunu “real irəliləyişin olmaması” ilə əsaslandırıb. Rusiyalı diplomat bu mövqeni əsassız adlandıraraq bildirib ki, məhz Kiyev 2025-ci ilin iyul ayından etibarən Moskvanın irəli sürdüyü təkliflərə cavab verməyib.
Onun sözlərinə görə, Rusiya tərəfi ikitərəfli atəşkəsə nəzarət və monitorinq mərkəzinin yaradılması, üç işçi qrupunun formalaşdırılması və nümayəndə heyətlərinin səviyyəsinin yüksəldilməsi ilə bağlı təkliflər irəli sürsə də, Ukrayna bunlara reaksiya göstərməyib. Polişuk danışıqlardakı fasiləyə görə məsuliyyətin Ukrayna tərəfinin üzərində olduğunu vurğulayıb və “top artıq Ukraynanın tərəfindədir” deyə qeyd edib.
Xatırladaq ki, Rusiya və Ukrayna əvvəllər dəfələrlə İstanbulda danışıqlar aparıblar və bu formatda son görüş 2025-ci ilin iyul ayında keçirilib. 2025-ci ilin noyabr ayının sonunda Türkiyə Prezidenti Rəcəb Tayyib Ərdoğan Ankaranın Moskva ilə Kiyev arasında birbaşa danışıqların təşkili üçün vasitəçi olmağa hazır olduğunu, mümkün platforma kimi isə İstanbulun nəzərdən keçirildiyini bəyan etmişdi.
Bununla yanaşı, 23–24 yanvar tarixlərində Əbu-Dabidə Rusiya, Ukrayna və ABŞ arasında üçtərəfli danışıqlar baş tutub. Görüşlərdə ən mürəkkəb məsələ kimi ərazi mövzusu ön planda olub. Danışıqlardan sonra yeni raundun hazırlanması ilə bağlı məlumatlar yayılıb.