BAKI,AzerVoice, Orxan Qədirzadə

2025-ci ildə Türkiyənin fındıq ixracından əldə etdiyi gəlir 2 milyard 255 milyon dollardan çox olub.

AzerVoice xəbər verir ki, Qara dəniz bölgəsi Fındıq İxracatçıları Birliyinin idarə heyətinin sədri Hasan Osman Sabir bununla bağlı yazılı açıqlama verib.

Onun sözlərinə görə, 1 yanvar–31 dekabr 2025-ci il tarixləri arasında Türkiyə 238 min 704 ton fındıq ixrac edib və bu ixracdan 2 milyard 255 milyon 360 min 699 dollar gəlir əldə olunub.

Sabir xatırladıb ki, 2024-cü ildə ölkə 323 min 244 ton məhsul ixrac edib və bu göstərici 2 milyard 635 milyon 868 min 856 dollar gəlir formalaşdırıb. Onun sözlərinə görə, 2025-ci ildə fındıq və fındıq məhsullarının ixrac həcmi əvvəlki illə müqayisədə 84 min 540 ton və ya 26,15 faiz azalıb, dəyər ifadəsində isə azalma 14,44 faiz təşkil edərək 380,5 milyon dollar olub.

Qeyd edilib ki, 2025–2026-cı illər ixrac mövsümünün ilk dörd ayı ərzində – 1 sentyabr–31 dekabr tarixlərində – 64 min 711 ton fındıq satışı həyata keçirilib və bu dövrdə əldə olunan gəlir 795 milyon 601 min 856 dollar olub.

Birlik sədri bildirib ki, mövsümün ilk dörd ayının ixrac göstəriciləri 1980-ci illərin səviyyəsinə enib. Onun sözlərinə görə, bu səbəbdən 2026-cı ildə sektorun problemlərinin kompleks şəkildə həlli üçün yeni və təcili tədbirlərin həyata keçirilməsi zəruridir.