BAKI,AzerVoice, Orxan Qədirzadə
Türkiyə Prezidenti Rəcəb Tayyib Ərdoğan, Prezident Külliyəsində keçirilən Nazirlər Kabinetinin iclasından sonra açıqlama verib. Ərdoğan çıxışında, "Türkiyə Yüzili" vizyonunun ardıcıl şəkildə həyata keçirildiyini və ölkənin bütün sahələrdə hədəflərinə doğru irəlilədiyini bildirib.
Ərdoğan, 11 noyabrda Azərbaycan-Gürcüstan sərhədinə yaxın Signagi bölgəsində baş verən və 20 türk hərbçisinin şəhid olduğu C-130 tipli hərbi təyyarə qəzasına toxunaraq bildirib ki, qəzanın ardından qardaş Gürcüstan və Azərbaycan bütün imkanlarını səfərbər edib.
“Qara qutuya və şəhidlərimizin nəşlərinə qısa müddətdə çatdıq. Şəhidlərimizin Azərbaycandan gətirilməsi və son mənzilə yola salınması mərasimində ministrlərimiz, deputatlarımız, hərbi və mülki rəhbərlik iştirak etdi. Qəzanın səbəbləri barədə ilkin məlumatlar şəffaf şəkildə ictimaiyyətə təqdim ediləcək.”-deyə prezident əlavə edib.
Prezident 5 il əvvəl istifadəyə verilən Ankara Millət Kitabxanasının hal-hazırda 141 milyon 700 min qaynaqla dünyanın üçüncü ən böyük kitabxanası olduğunu qeyd edərək, indiyə qədər 8 milyon 650 min ziyarətçini qəbul etdiklərini bildirib. Gündə iki dəfə şorba, içki və qəlyanaltıların ziyarətçilərə pulsuz təqdim edildiyini vurğulayıb.
Ərdoğan bildirib ki, Türkiyə bir zamanlar toplu iynə belə istehsal edə bilmirdisə, indi İHA və SİHA istehsalında dünyanın ilk 3 ölkəsi arasında yer alır.
“2002-ci ildə illik ixracatımız 36 milyard dollar idi. 2025-ci ilin oktyabrına qədər bu rəqəm 270,2 milyard dollara çatıb. Xidmət ixracatında da 121,6 milyard dollarla rekord əldə etmişik.”-prezident deyib.
Ərdoğan Kiprlə bağlı çıxışında iki dövlətli həll modelinin yeganə real yol olduğunu bildirərək, “Kibr məsələsinin həlli ada üzərində iki bərabər hüquqlu dövlətin birlikdə varlığına əsaslanmalıdır” deyib.
Prezident Qəzzada Türkiyənin təşəbbüsü ilə əldə olunan atəşkəsin davam etməsinin vacibliyini vurğulayıb.
“İsrailin maneələrinə baxmayaraq Qəzzaya humanitar yardımlarımız çatdırılır. 18-ci 'Yaxşılıq Gəmisi' 810 ton yardım yükləri ilə El-Arish limanına çatdı.”-deyə Ərdoğan əlavə edib.
Ərdoğan həmçinin deyib ki, Türkiyə konteyner tipli müvəqqəti yaşayış məntəqələrini Qəzzaya göndərməklə bölgədə humanitar vəziyyətin yüngülləşdirilməsinə töhfə verməyi planlaşdırır.
Ərdoğan qida təhlükəsizliyi ilə bağlı son vəziyyəti də paylaşaraq, il ərzində ölkə üzrə 1 milyon 103 min qida nəzarətinin həyata keçirildiyini, qaydaları pozan 25 min 750 müəssisəyə 2 milyard 206 milyon lirə məbləğində cərimə kəsildiyini deyib. Saxta və təhlükəli məhsullarla bağlı məlumatların anında ictimaiyyətə açıqlanacağını bildirib.
O qeyd edib ki, yeni QR kod tətbiqi ilə vətəndaşlar istənilən qida müəssisəsinin ən son nə zaman yoxlanıldığını dərhal öyrənə biləcəklər.