BAKI, AzerVoice, Fərid Mikayılov

Türkiyənin Daxili İşlər naziri Ali Yerlikaya ölkə üzrə keçirilən kiber cinayət əməliyyatlarında 61 şübhəlinin saxlanıldığını açıqlayıb.

AzerVoice xəbər verir ki, nazir Yerlikaya X sosial media hesabında yayımladığı açıqlamada bildirib ki, Erzurum, Ankara, Van, Şanlıurfa, Ordu, Kahramanmaraş, Sinop, Ağrı və Giresun mərkəzli əməliyyatlarda, ümumilikdə 200 milyon lirəlik maliyyə dövriyyəsinə malik kiber şəbəkə çökdürülüb.

Əməliyyat nəticəsində 61 nəfər saxlanılıb, onlardan 27-si həbs edilib, 17-si barəsində məhkəmə nəzarəti tətbiq olunub, digərlərinin istintaqı isə davam edir.

İstintaq materiallarına görə, şübhəlilər sosial media platformaları və saxta internet səhifələri vasitəsilə hədiyyə çekləri, mebel satışı elanları kimi saxta kampaniyalarla vətəndaşları aldadıblar.

Bundan başqa, qeyri-qanuni onlayn sorğu panelləri vasitəsilə şəxsi məlumatları ələ keçirərək, bəzən bu hesablar üzərindən terror təbliğatı apardıqları müəyyən olunub.

Yerlikaya bildirib ki, sosial media üzərindən dələduzluq edən cinayətkar şəbəkələrə qarşı mübarizə qətiyyətlə davam etdiriləcək.