BAKI,AzerVoice, Fərid Mikayılov
Türkiyənin Milli Kəşfiyyat Təşkilatı (MİT), İstanbul Cumhuriyyət Baş Prokurorluğu və İstanbul Polis İdarəsinin birgə əməliyyatı nəticəsində İsrail gizli xidməti MOSSAD üçün çalışdığı müəyyən edilən Serkan Çiçək saxlanılıb.
AzerVoice xəbər verir ki, Serkan Çiçəyin İsrailin Onlayn Əməliyyat Mərkəzinin üzvü Faysal Rəşidlə əlaqədə olduğu aşkar edilib.
Çiçək, Rəşidin İsrailin Yaxın Şərq siyasətlərinə qarşı çıxan fələstinli bir aktivistə yönəlmiş casusluq tapşırığını qəbul edib.
MİT-in araşdırmalarına görə, əsl adı Muhammet Fatih Keleş olan Serkan Çiçək iş həyatında çoxlu borca girdikdən sonra adını dəyişdirib. Daha sonra isə ticarəti buraxaraq 2020-ci ildən “Pandora Detektivliyi” adlı qurum yaradıb və detektivlik fəaliyyəti ilə məşğul olmağa başlayıb.
Bu müddətdə İsrailə casusluq ittihamı ilə həbs olunan və dövlət qeydiyyatındakı şəxsi məlumatların maddi qazanc qarşılığında detektivlərə ötürülməsində rol oynayan Musa Kuş və vəkil Tuğrulhan Diple tanış olub. Çiçək həm hazırda həbsdə olan Musa Kuş, həm də Tuğrulhan Diple müxtəlif fəaliyyətlərdə əməkdaşlıq edib.
Detektivlik fəaliyyəti ilə məşğul olan Serkan Çiçək MOSSAD-ın diqqətini cəlb edib. MOSSAD üzvü Faysal Rəşid, özünü xaricdə fəaliyyət göstərən hüquq bürosunun əməkdaşı kimi təqdim edərək 31 iyul 2025-ci ildə WhatsApp vasitəsilə Çiçəklə əlaqə saxlayıb.
Rəşid ondan İstanbulun Başakşehir rayonunda yaşayan, İsrailin Yaxın Şərq siyasətlərinə müxalif fələstinli bir aktivistə qarşı dörd günlük izləmə aparmağı tələb edib. Bu tapşırıq müqabilində 1 avqust 2025-ci ildə Serkan Çiçəyə 4 min ABŞ dolları dəyərində kriptovalyuta ödənişi edib.
Çiçək internet üzərindən araşdırma apardıqda hədəfin həqiqətən də fələstinli bir aktivist olduğunu öyrənib. Onun dəstək aldığı Musa Kuşun İsrailə işlədiyi üçün 19 il həbs cəzası aldığını bilməsinə baxmayaraq, Faysal Rəşidin təklifini qəbul edib.